یوکرین پر روسی میزائل حملہ، ہلاکتوں کی تعداد 22 ہوگئی

کیف: یوکرین کے شمالی علاقے چرنی ہیو کے شہر پریلوکی میں روسی میزائل حملے کے نتیجے میں ہلاکتوں کی تعداد 22 ہوگئی، جن میں 5 بچے بھی شامل ہیں۔

چرنی ہیو کے گورنر ویاچسلاو چاؤس کے مطابق حملہ بدھ کی سہ پہر کیا گیا۔ ان کا کہنا ہے کہ حملے میں چار افراد موقع پر ہی ہلاک ہوئے جبکہ ایک بچے نے اسپتال میں دم توڑا۔ دیگر متاثرین کی ہلاکتوں کی تفصیلات بھی حکام کی جانب سے جاری کی گئی ہیں۔

گورنر کے مطابق روسی حملے میں علاقائی دارالحکومت چرنی ہیو کو بھی نشانہ بنایا گیا، جہاں ایک تین منزلہ عمارت میں آگ لگ گئی۔ امدادی کارروائیوں کے دوران آگ پر قابو پالیا گیا۔

یوکرینی صدر ولادیمیر زیلنسکی نے دعویٰ کیا ہے کہ پریلوکی میں ایک رہائشی عمارت کو کے-101 میزائل کے ذریعے نشانہ بنایا گیا۔

زیلنسکی نے مزید کہا کہ یوکرین کو فضائی دفاع کے لیے مزید میزائلوں اور دیگر ضروری سامان کی ضرورت ہے۔ ان کے مطابق روسی فضائی حملوں کا خطرہ برقرار ہے اور ملک کے فضائی دفاعی نظام کو مسلسل تیار رکھنے کی ضرورت ہے۔

یوکرینی صدر نے اتحادی ممالک سے فضائی دفاعی نظام کے لیے ضروری سازوسامان کی بروقت فراہمی اور اس کی پیداوار میں اضافے پر بھی زور دیا۔