خیبرپختونخوا کے ہسپتالوں کی بندش کا انکشاف، صحت کے نظام میں اصلاحات کا فیصلہ

خیبرپختونخوا میں صحت کے شعبے سے متعلق ایک تشویشناک انکشاف سامنے آیا ہے جہاں صوبے بھر میں 200 سے زائد ہسپتال برسوں سے بند پڑے ہیں۔ اس صورتحال نے مقامی آبادی کے لیے طبی سہولیات کی فراہمی کو شدید متاثر کیا ہے۔

پشاور میں دی گئی ایک تفصیلی بریفنگ کے دوران بتایا گیا کہ بڑھتی ہوئی آبادی کے تناسب سے صوبے میں موجود 18 ہزار بستروں کے مقابلے میں 64 ہزار بستروں کی اشد ضرورت ہے۔ صحت کے نظام کو بہتری کی طرف لے جانے کے لیے حکومت نے کئی اہم اقدامات کا فیصلہ کیا ہے۔ سرکاری دستاویزات اور بریفنگ کے مطابق صوبے کے 124 ہسپتالوں کو شمسی توانائی پر منتقل کیا جائے گا تاکہ بجلی کی عدم فراہمی کے مسائل پر قابو پایا جا سکے۔

اس کے علاوہ طبی سہولیات کی بہتری کے لیے فنڈز کی تخصیص بھی کر دی گئی ہے۔ بریفنگ میں بتایا گیا کہ 12 اضلاع کے ہسپتالوں کے لیے طبی آلات کی خریداری پر 1 ارب 65 کروڑ روپے خرچ کیے جائیں گے، جبکہ 25 اضلاع کے ہسپتالوں کے لیے طبی آلات کی خریداری پر مزید 2 ارب روپے مختص کیے گئے ہیں۔

مشیر صحت نے واضح کیا کہ صحت کارڈ کو ختم نہیں کیا جائے گا بلکہ اس میں موجود خامیوں کو دور کرکے اسے مزید بہتر بنایا جائے گا تاکہ عوام زیادہ سے زیادہ مستفید ہو سکیں۔ اس کے علاوہ وزیراعظم نے حیات آباد میں بچوں کے ہسپتال کے لیے 1 ارب 46 کروڑ 20 لاکھ روپے فراہم کرنے کا وعدہ کیا ہے۔ وفاقی حکومت کے تعاون سے صوبے کے 5 ڈویژن میں بریسٹ کینسر سینٹرز کے قیام کے لیے 85 کروڑ روپے بھی فراہم کیے جائیں گے۔