پاکستانی تجزیہ کار نے بھارتی ٹی وی شو میں فالس فلیگ آپریشنز کا پول کھول دیا
مودی سرکار کا پروپیگنڈا بے نقاب، کلگام و پہلگام کے الزامات جھوٹے نکلے، حیدر حیات خان کا دوٹوک موقف۔
پاکستانی تجزیہ کار حیدر حیات خان بھارتی نیوز چینل کے لائیو شو میں گفتگو کرتے ہوئے۔
پاکستانی تجزیہ کار حیدر حیات خان نے ایک بھارتی نیوز چینل کے لائیو پروگرام میں شرکت کرتے ہوئے بھارتی میڈیا کے پاکستان مخالف پروپیگنڈے اور بے بنیاد الزامات کو ٹھوس حقائق کے ساتھ مکمل طور پر بے نقاب کر دیا ہے۔
پروگرام کے دوران گفتگو کرتے ہوئے حیدر حیات خان نے واضح کیا کہ مودی سرکار اور بھارتی میڈیا مقبوضہ کشمیر میں پیش آنے والے ہر سیکیورٹی واقعے کو بغیر کسی ثبوت کے فوری طور پر پاکستان سے جوڑنے کی کوشش کرتے ہیں۔ انہوں نے مثال دیتے ہوئے بتایا کہ اس سے قبل بھارتی فوج نے موسیٰ عرف آصف فوجی کو شہید کرنے کا جھوٹا دعویٰ کیا تھا، تاہم ڈی جی آئی ایس پی آر نے بعد میں انہیں زندہ حالت میں میڈیا کے سامنے پیش کر کے بھارتی دعوؤں کی قلعی کھول دی تھی。
حیدر حیات خان نے مزید انکشاف کیا کہ حال ہی میں کلگام کے واقعے پر بھارتی میڈیا نے اس شور شرابے کے ساتھ پروپیگنڈا کیا کہ اس میں لشکر طیبہ سے وابستہ لطیف بٹ ملوث ہیں۔ لیکن حقیقت یہ ہے کہ لطیف بٹ جموں و کشمیر یوتھ نیشنل کانفرنس کے نارتھ کشمیر کے جوائنٹ سیکرٹری ہیں، جو خود میڈیا کے سامنے آ گئے اور بھارتی الزامات کو جھوٹا ثابت کر دیا۔
پاکستانی تجزیہ کار کا کہنا تھا کہ مودی حکومت ہر الیکشن سے قبل سیاسی فائدے کے لیے فالس فلیگ آپریشنز کا سہارا لیتی ہے اور پاکستان مخالف بیانیے کو ہوا دینے کے لیے بھارتی میڈیا کو بطور آلہ استعمال کرتی ہے، مگر اب ان کے یہ تمام جھوٹے ہتھکنڈے عالمی سطح پر بے نقاب ہو چکے ہیں۔