دنیا بھر میں آج جمعتہ الوداع کویوم مقدس منایا جارہا ہے

کراچی: پاکستان سمیت دنیا بھر میں آج جمعۃ الوداع اور یوم مقدس منایا جارہا ہے۔
رمضان المبارک کے آخری جمعہ کو جمعۃ الوداع کے طور انتہائی عقیدت و احترام سے منایا جاتا ہے۔ پاکستان سمیت دنیا بھر میں مساجد میں خصوصی عبادات ادا کی جائیں گی اور علمائے کرام خطبہ میں جمعۃ الوداع کی اہمیت بیان کریں گے۔
دوسری جانب پاکستان سمیت دنیا کے کئی ممالک میں فلسطینیوں سے اظہار یکجہتی اور القدس کی آزادی کے عزم کے ساتھ آج یوم القدس بھی منایاجارہا ہے۔ اس سلسلے میں ملک بھر میں القدس ریلیوں کا اہتمام کیا گیا ہے
ٹریفک پولیس کی جانب سے یوم القدس کی ریلی کا ٹریفک پلان بھی جاری کردیا گیا۔ ٹریفک پولیس کے مطابق یوم القدس کے موقع پر ریلی نمائش سے تبت سینٹر تک نکالی جائے گی۔
ٹریفک پولیس کے مطابق تین ہٹی سے آنے والے ٹریفک کو سولجر بازار موڑا جائے گا، لسبیلہ سے آنے والے ٹریفک کو پیپلزچورنگی، پریڈی اسٹریٹ سے تبت سینٹر جانے والے ٹریفک کو کوریڈور تھری، فریسکو چوک سے تبت سینٹر جانے والے ٹریفک کو جوبلی کی طرف موڑا جائے گا۔
ٹریفک پلان کے مطابق لکی اسٹار سے آنے والے ٹریفک کو کوریڈور تھری اور گارڈن سے کوسٹ گارڈ آنے والے ٹریفک کو سولجر بازار کی جانب موڑا جائے گا۔