اسحا ق ڈار واپس آئیں گے تو ہی انصاف ملے گا،چیف جسٹس

سابق وزیر خزانہ اسحاق ڈار کی وطن واپسی کے معاملے پر چیف جسٹس پاکستان میاں ثاقب نثار نے ریمارکس دیئے کہ اسحاق ڈار واپس آئیں گے تو ہی انہیں انصاف ملے گا۔
سپریم کورٹ میں مسلم لیگ (ن) کے سینئر رہنما اسحاق ڈار کی وطن واپسی سے متعلق کیس کی سماعت ہوئی، ایڈیشنل اٹارنی جنرل نے عدالت کو بتایا کہ اسحاق ڈار کی واپسی کے حوالے سے برطانیہ کو خط لکھ دیا ہے، برطانیہ نے سابق وزیرخزانہ کی واپسی کے حوالے سے سوالنامہ بھیجا ہے جو حکومت آج نیب کے حوالے کرے گی۔
دوران سماعت چیف جسٹس نے ریمارکس دیے کہ اسحاق ڈار کی بیماری کا ایشو کم ہے، وہ کہتے ہیں مجھے انصاف نہیں ملے گا، جب انصاف ملے گا پاکستان آؤں گا، نہیں معلوم وہ کس قسم کا انصاف چاہتے ہیں، اسحاق ڈار واپس آئیں گے تو انہیں انصاف ملے گا۔ عدالت نے کیس میں ہونے والی پیش رفت کے حوالے سے رپورٹ طلب کرتے ہوئے سماعت ایک ماہ تک کے لئے ملتوی کردی۔
واضح رہے اسحاق ڈار پاکستان میں ایک سے زائد مقدمات میں مطلوب ہیں اور ان کے خلاف پاناما لیکس کے تناظر میں نیب ریفرنس بھی دائر ہے جس میں وہ اشتہاری قرار دیے گئے ہیں۔