نواز شریف سے ملاقات کادن،بارش کے باعث لیگی رہنمائوں کو مشکلات کا سامنا

لاہورکی کوٹ لکھپت جیل میں قید سابق وزیراعظم نواز شریف کیلئے آج ملاقاتیں کرنے کا دن ہے، ،مریم نواز بھی اپنے والدسے ملاقات کیلئے کوٹ لکھپت جیل پہنچ گئیں۔ بارش کے باعث کیچڑ ہونے کی وجہ سے آنے والوں کو مسائل کا سامنا ہے۔

سابق وزیراعظم نوازشریف سے ملاقات کیلئے لیگی رہنماؤں کی آمد کا سلسلہ جاری ہے، ن لیگ کے رہنماپرویزرشید، امیر مقام ،طلال چودھری سمیت دیگر رہنما کوٹ لکھپت جیل پہنچ گئے، سابق وزیراعظم نوازشریف کی صاحبزادی مریم نواز بھی والد سے ملاقات کیلئے جیل پہنچ گئیں۔

اس موقع پر کوٹ لکھپت کے باہر موجود لیگی کارکنوں نے مریم نوازکا استقبال کیا اور نعرے بازی بھی کی۔مریم نواز اپنے ساتھ والد کیلئے کھانا بھی لائیں۔

لاہور میں بارش کے باعث ملاقات کے لیے آنے والوں کو مشکلات کا سامنا ہے جب کہ مسلم لیگ (ن) کے کارکن بھی کوٹ لکھپت جیل کے باہر جمع ہیں۔

یاد رہے کہ سابق وزیراعظم نواز شریف احتساب عدالت کی جانب سے العزیزیہ اسٹیل ملز ریفرنس میں دی گئی 7 سال قید کی سزا کاٹ رہے ہیں۔