قومی اسمبلی۔شمالی وزیرستان واقعے پر اپوزیشن اور حکومت میں گرما گرمی

قومی اسمبلی کے اجلاس کے دوران شمالی وزیرستان واقعے پراپوزیشن اور حکومت کے درمیان شدید گرما گرمی ہوئی،مراد سعید کا خطاب شروع ہوتے ہی حزب اختلاف نے کارروائی کا واک آؤٹ کردیا۔

قومی اسمبلی میں نکتہ اعتراض پر بات کرتے ہوئے مسلم لیگ (ن) کے خواجہ آصف نے کہا کہ ہم نے ہر دور میں غلطیاں کیں، ہم نے مشرقی پاکستان میں غلطیاں کیں،ریاست کو ماں کا کردارادا کرنا چاہیے،خیبر پختونخوا سے کراچی اور گوادر تک ہمارے مسائل حل نہیں ہو رہے۔

خواجہ آصف نے کہا کہ پچاس کی دہائی سے بلوچستان میں انتشار جاری ہے، بلوچستان میں ہر 4 ،5 دن بعد دہشت گردی ہو رہی ہے، بلوچستان میں اکبر بگٹی کی شہادت سے ایک المیہ پیدا ہوا ، سرحد پارایسے لوگ بیٹھے ہوئے ہیں جو ہمارے دشمنوں کے آلہ کار ہیں، فالٹ لائنز کو درست نہ کیا تو پاکستان کی سلامتی کو خطرہ ہے۔

مسلم لیگ (ن) کے رہنما کا کہنا تھا کہ دہشت گردی کی جنگ میں فاٹا سب سے زیادہ متاثر ہوا ، ہم نے اپنی پراکسی وارز کے لئے ان کا رسم و رواج اور تشخص تباہ کردیا ، ہماری ذمہ داری ہے فاٹا کو قومی دھارے میں لائیں، اب آئینی اور قانونی طور پر فاٹا کا تشخص بدل چکا ہے

انہوں نے کہا کہ فاٹا انضمام سرتاج عزیز کی کمیٹی کی رپورٹ پر ہوا، چند روز قبل ایک متفقہ آئینی ترمیم کو منظور کیا گیا جو نجی بل تھا، افسوس کچھ عناصر اب سینیٹ سے اس بل کی متفقہ منظوری نہیں چاہتے۔

خواجہ آصف نے کہا کہ فاٹا کو جنگ میں دھکیلنے کا خمیازہ پتا نہیں کتنی نسلیں بھگتیں گی، فاٹا کے لوگوں سے سیاسی طریقے سے بات چیت کرنا چاہیے، کل جو واقعہ ہوا ہے اس کی تفصیلات میں نہیں جاؤں گا کیونکہ وہ افسوسناک ہیں، ہماری دھرتی پر خون کسی کا بھی گرے وہ انتہائی افسوس ناک ہے

ان کا کہناتھا کہ کل کے واقعے پر 2 ارکان قومی اسمبلی کے نام سامنے آرہے ہیں، کہا جارہا ہے کہ کل کے واقعے پر ایک ایم این اے گرفتار اور دوسرا فرار ہے۔ بلوچستان اور فاٹا کے معاملات سیاسی طور پر حل کیے جائیں، وزیراعظم کا اس سلسلے میں بیان اب ناگزیرہے۔

رہنما مسلم لیگ (ن) کی تقریر پر وفاقی وزیر مراد سعید نے جواب میں کہا کہ سابق حکومت کی غلط پالیسیوں کی وجہ سے ہم بے گھر ہوئے، ان سب کا احتساب کرنا ہوگا جنہوں نے فاٹا کو ترقی نہ دی۔

ان کا کہناتھاکہ ہم بھارتی جہاز گرا رہے تھے اور یہاں ایک پارٹی کا لیڈر بھارتی موقف بیان کررہا تھا، ہم دشمن کے طیارے گراتے ہیں یہاں کسی اورکے بیانیے کی بات ہوتی ہے،نقیب اللہ محسود کا قاتل راؤ انوار آج کہاں ہے، بلاول بھٹو زرداری کو بتانا چاہتا ہوں کہ راوٴ انوار تمہارے باپ کا بہادربچہ ہے جب کہ نقیب اللہ کی شہادت کے بعد ہی پی ٹی ایم بنی تھی۔

مراد سعید نے کہا کہ شمالی وزیرستان میں جو واقعہ ہوا اس کی فوٹیجزموجود ہیں، محمود اچکزئی اور محسن داوڑ تو سرحد پر خاردار تاریں لگانے کے خلاف تھے ، یہ لوگ نہیں چاہتے تھے ہماری سرحدیں محفوظ ہوں۔

انہوں نے کہا کہ افغانستان سے ’را‘ اور ’این ڈی ایس‘ کا گٹھ جوڑ یہاں دہشت گردی کرتا ہے، محسن داوڑ جواب دیں کہ ان کا افغان خفیہ تنظیم این ڈی ایس سے کیا تعلق ہے ورنہ ان کو بے نقاب کردوں گا۔ اب پاک فوج کو گالیاں دینے کا سلسلہ بند ہونا چاہیے۔

مراد سعید کی تقریر کے دوران اپوزیشن ارکان نے شور شرابا شروع کردیا اور نعرے لگاتے ہوئے ایوان سے واک آوٴٹ کردیا۔