جمعیت علمائےاسلام کے ناراض رہنما مولانا محمد خان شیرانی کا بڑا اعلان

جمعیت علمائےاسلام پاکستان کے ناراض رہنما مولانا محمد خان شیرانی نے بڑا اعلان کرتے ہوئے جے یو آئی پاکستان کو جے یو آئی ” ف“ سے الگ کرنے کا اعلان کر دیا ۔

اسلام آباد میں پریس کانفرنس سے خطاب کرتے ہوئے مولانا محمد خان شیرانی کا کہناتھا کہ اکابرین سے وراثت میں ملی جماعت کا نام ” جے یو آئی پاکستان “ ہے ، مولانا فضل الرحمن نے ”ف “ کے نام سے اپنا گروپ تشکیل دیا ، جے یو آئی اراکین نے معاملہ اجلاس میں رکھا ، ہم کبھی بھی جے یو آئی ف یا مولانا فضل الرحمن گروپ کا حصہ نہیں رہے ، ہم دستورکے مطابق جے یو آئی کے رکن ہیں اور رہیں گے جبکہ دیگرتمام اراکین اب اس جماعت کے رکن نہیں رہے ۔

مولانا محمد خان شیرانی کا کہناتھا کہ ہمارا کوئی رکن قرآن سنت کے منافی اقدام نہیں کرے گا، اللہ کہتاہے کہ جھوٹوں کی پیروی نہ کرو ، جھوٹے اورخائن پراللہ کی لعنت ہوتی ہے،جھوٹ انسان کو تباہی کے گڑھے میں دھکیل دیتا ہے ۔ ان کا کہناتھا کہ اب جوکچھ ہورہاہے وہ صداقت اوردیانت پرمبنی نہیں۔