سال نو: ہوائی فائرنگ کرنیوالوں کیخلاف اقدام قتل کا مقدمہ درج ہوگا

کراچی: سندھ پولیس نے خبردار کیا ہے کہ سال نو کے موقع پر اگر ہوائی فائرنگ کی گئی تو ملزمان کے خلاف اقدام قتل کا پرچہ درج کیا جائے گا۔
سندھ پولیس کے ترجمان نے کہا ہے کہ سال نو کے موقع پر شہری گھروں سے باہر نکلتے وقت ماسک کا لازمی استعمال کریں اور کسی ایک جگہ جمع ہو کر ہجوم کا سبب نہ بنیں۔
ترجمان سندھ پولیس کے مطابق کسی بھی مقام یا گھر سے ہوائی فائرنگ کی گئی تو ملوث ملزمان کے خلاف اقدام قتل کا مقدمہ درج کیا جائے گا۔
ترجمان سندھ پولیس کے مطابق نیوایئر نائٹ پر تمام زونل ڈی آئی جیز کی نگرانی میں ڈسٹرکٹ ایس ایس پیز اور ایس پی انوسٹی گیشنز عملے کے ہمراہ اپنے علاقوں پرموجود رہیں گے۔
ترجمان کے مطابق کراچی پولیس کے سکیورٹی یونٹ سے اضافی نفری ایس ایس پی ایسٹ، ملیر اورساؤتھ کو مددگار ون فائیو کی معاونت کے لیے موجود ہوگی۔
سندھ پولیس کے ترجمان نے بتایا ہے کہ سال نو کے موقع پر شہریوں کے پسندیدہ مقام سی ویو پر سیکیورٹی کے سخت انتظامات کئے گئے ہیں۔
اس ضمن میں ساؤتھ زون پولیس کے مطابق 15 سو سے زائد پولیس اہلکار ڈیوٹی پر مامور ہوں گے۔ سی یو سگنل سے ویلیج ہوٹل تک روڈ کو ون وے کردیا گیا ہے۔ پولیس کے دستے ساحل و اطراف میں گشت کریں گے۔
پولیس نے پہلی مرتبہ موٹر مکینکس کی خدمات بھی حاصل کی ہیں تاکہ گاڑیاں خراب ہونے کی صورت میں شہریوں کی مفت مدد کی جا سکے۔
سندھ پولیس کے ترجمان کا کہنا ہے کہ ون ویلنگ اوربغیرسائلنسر والی موٹر سائیکلیں چلانے والوں کے خلاف کارروائی کی جائے گی۔