الیکشن کمیشن پیپلزپارٹی اور ن لیگ کی بھی فارن فنڈنگ تحقیقات پبلک کرے،عمران

اسلام آباد: وزیراعظم عمران خان نے کہا ہے کہ الیکشن کمیشن تینوں بڑی جماعتوں کے فارن فنڈنگ کیس کی تحقیقات پبلک کرے۔
وزیر اعظم عمران خان کا کہنا تھا کہ پی ٹی آئی واحد جماعت ہے جس نے سیاسی فنڈ ریزنگ کی۔
ایک نجی ٹی وی کو دیے گئے انٹرویو میں عمران خان کا کہنا تھا کہ کرپٹ لوگ قومی مجرم ہیں۔ کرپٹ لوگوں کو تسلیم نہیں کیا جاسکتا۔
انہوں نے کہا کہ جمہوریت میں وزیراعظم بھی جوابدہ ہوتا ہے لیکن اپوزیشن والے کہتے ہیں ہم چوری کے لیے جوابدہ نہیں ہیں۔
ان کا کہنا تھا کہ جب سے حکومت میں آئے اپوزیشن بلیک میل کر رہی ہے، پی ڈی ایم کی ساری تحریک این آر او کیلئے ہے۔ یقین دلاتا ہوں یہ حکومت میں واپس نہیں آئیں گے۔
وزیر اعظم عمران خان کا کہنا تھا کہ پاکستان میں جمہوریت نہیں خاندانی نظام ہے، سارے بچے باریاں لینے کے لیے تیار بیٹھے ہیں، ایک بچہ جو اردو نہیں بول سکتا وزیراعظم بننا چاہتا ہے۔
انہوں نے انکشاف کیا کہ دو ممالک پیپلزپارٹی اور نون لیگ کو فنڈنگ کرتے رہے، مجھے بھی پیسوں کی آفر کی گئی، شیخ رشید ان دونوں ممالک کا بتا سکتے ہیں۔
ندیم افضل چن کے استعفیٰ پر وزیراعظم عمران خان نے کہا کہ کسی سے کوئی استعفیٰ نہیں مانگا، کابینہ کے فیصلے کے خلاف جانا ہے تو استعفیٰ دے دیں، دنیا بھر کی جمہوریت میں ایسا ہی ہوتا ہے۔