امریکی حملوں کے خدشات۔عالمی منڈی میں خام تیل کی قیمتیں بڑھ گئیں

جنوبی ایران کے بندرگاہی شہر بندر عباس میں حملوں کی اطلاعات اور امریکہ و اسرائیل کے درمیان کشیدگی کے باعث عالمی خام تیل کی قیمتوں میں اضافہ ریکارڈ کیا گیا ہے۔
برینٹ کروڈ آئل کے فیوچرز ایشیائی مارکیٹ کے ابتدائی کاروبار میں 2 فیصد تک بڑھ گئے، جبکہ بعد ازاں یہ اضافہ 1.5 فیصد تک مستحکم رہا۔ قیمت میں یہ اضافہ ایران کے جنوبی علاقے میں پیش آنے والے واقعات کے بعد دیکھا گیا، جس سے عالمی تاجروں میں بے چینی پائی جا رہی ہے۔
برینٹ کروڈ 1.40 ڈالر اضافے کے ساتھ 97.56 ڈالر فی بیرل پر ٹریڈ ہوا، تاہم اس سے قبل کے سیشن میں یہ 7 فیصد کمی کے ساتھ بند ہوا تھا، جب ممکنہ جنگ بندی یا معاہدے کی امیدوں کے باعث قیمتوں میں کمی دیکھی گئی تھی۔
امریکی ویسٹ ٹیکساس انٹرمیڈیٹ (WTI) خام تیل 91.25 ڈالر فی بیرل پر پہنچ گیا، جو گزشتہ روز کے مقابلے میں معمولی اضافہ ہے، تاہم جمعہ کی بندش کے مقابلے میں یہ 5.5 فیصد کم ہے۔
ماہرین کے مطابق مشرق وسطیٰ میں جاری کشیدگی اور ایران کے توانائی مراکز کے گرد غیر یقینی صورتحال تیل کی عالمی قیمتوں پر مسلسل اثر انداز ہو رہی ہے۔