دنیا بھر میں کورونا سے متاثرہ افراد کی تعداد 40 لاکھ سے تجاوز

دنیا بھر میں کورونا وائرس سے متاثرہ افراد کی تعداد 40 لاکھ  سے زائد ہوگئی جبکہ دولاکھ 75 ہزار سے زائد افراد جہان فانی سے کوچ کرچکے ہیں۔

عالمی خبر رساں ادارے کے مطابق پوری دنیا میں اب تک اپنے یقین، مضبوط قوت ارادی اورطاقتور مدافعتی نظام کی بدولت 13 لاکھ 70 ہزار سے زائد افراد کورونا کو شکست  دے چکے۔

خبر رساں ادارے کے مطابق امریکہ میں کورونا وائرس سے متاثرہ افراد کی تعداد 13 لاکھ  سے بڑھ گئی جبکہ 78 ہزار سے زائد اموات ریکارڈ کی جا چکی ہیں۔

اعداد و شمارکے مطابق اسپین میں کورونا سے متاثرہ افراد کی تعداد دو لاکھ 60 ہزارسے زائد ہو گئی   مزید 229 افراد کی جان لے لی اس طرح اسپین میں جاں بحق ہونے والوں کی کل تعداد 26 ہزار سے بڑھ گئی ہے۔

اٹلی میں کورونا سے متاثرہ افراد کی تعداد دو لاکھ15 ہزار سے زائد ہو گئی ہے جب کہ مزید 369 افراد اپنی جانوں کی بازیاں ہار گئے ہیں۔ اٹلی میں جاں بحق ہونے والوں کی کل تعداد 29 ہزار958 سے زائد ہو گئی ہے۔

برطانیہ میں کورونا سے متاثرہ مریضوں کی تعداد دو لاکھ 6 ہزار سے زائد ہو گئی ہے جبکہ ہلاکتوں کی تعداد30ہزار سے تجاوزکرگئی ہے۔

فرانس میں ایک لاکھ 74 ہزار سے زائد افراد اب تک کورونا وائرس سے متاثر ہو چکے ہیں۔ اعداد و شمار کے مطابق فرانس میں کورونا سے مزید 278 افراد جاں بحق ہوئے ہیں جس کے بعد کل تعداد 25 ہزار987 سے بڑھ گئی ہے۔