ایران نے یورینیم افزودگی کو 5 سال کے لیے معطل کرنے کی پیشکش کی، نیو یارک ٹائمز کا دعویٰ

واشنگٹن — امریکی اخبار نیو یارک ٹائمز نے دعویٰ کیا ہے کہ ایران نے اپنے جوہری پروگرام کے تحت یورینیم افزودگی کو 5 سال کے لیے معطل کرنے کی پیشکش کی ہے۔

رپورٹ کے مطابق ایران کی جانب سے یہ تجویز جوہری مذاکرات کے دوران سامنے آئی، تاہم امریکا نے اسے ناکافی قرار دیتے ہوئے 20 سالہ معطلی پر زور دیا۔

ذرائع کے مطابق دونوں ممالک کے حکام کے درمیان اسلام آباد میں ہونے والے مذاکرات میں جوہری سرگرمیوں سے متعلق مختلف تجاویز پر تفصیلی بات چیت ہوئی، لیکن مدت کے تعین پر اختلاف برقرار رہا۔

رپورٹ میں بتایا گیا ہے کہ امریکا طویل المدتی معطلی چاہتا ہے جبکہ ایران محدود مدت کی پابندی پر آمادہ دکھائی دیتا ہے، جس کے باعث مذاکرات کسی حتمی معاہدے تک نہیں پہنچ سکے۔

تجزیہ کاروں کے مطابق دونوں ممالک کے درمیان جوہری پروگرام پر اختلافات خطے میں کشیدگی کی بڑی وجہ ہیں، جبکہ مذاکرات کا جاری رہنا مستقبل میں کسی ممکنہ پیش رفت کی امید کو برقرار رکھتا ہے۔