ایران جنگ سے قبل اسرائیل نے عراق میں دو خفیہ فوجی اڈے قائم کیے:رپورٹ

امریکی اخبار نیویارک ٹائمز نے رپورٹ کیا ہے کہ اسرائیل نے ایران کے خلاف امریکا-اسرائیل جنگ سے قبل عراق کے مغربی صحرا میں دو خفیہ فوجی اڈے قائم کیے۔

رپورٹ کے مطابق عراقی حکام نے مغربی عراق کے صحرائی علاقے میں دو خفیہ اسرائیلی آپریٹڈ بیسز کی نشاندہی کی ہے، جس کا حوالہ ایک عراقی عہدیدار اور ایک قانون ساز نے دیا۔ اخبار کے مطابق ایک علاقائی عہدیدار نے بتایا کہ ان میں سے ایک عارضی سائٹ کی تیاری 2024 کے آخر سے جاری تھی۔

مزید بتایا گیا کہ گزشتہ ہفتے وال اسٹریٹ جرنل نے بھی رپورٹ کیا تھا کہ ایک اڈہ جنگ شروع ہونے سے کچھ دیر قبل قائم کیا گیا تھا اور یہ امریکا کی معلومات کے ساتھ فعال تھا۔ اس اڈے میں اسرائیلی اسپیشل فورسز موجود تھیں اور یہ فضائی کارروائیوں کیلئے لاجسٹک مرکز کے طور پر استعمال ہوتا تھا۔

رپورٹ کے مطابق اسی اڈے میں پائلٹس کی ہنگامی ریسکیو صلاحیتیں بھی موجود تھیں۔ اسرائیلی فورسز نے مبینہ طور پر مارچ کے اوائل میں ان عراقی یونٹس پر حملے کیے جو اس مقام کے قریب پہنچ گئے تھے۔

اوپن سورس تجزیہ کاروں نے سیٹلائٹ تصاویر کی مدد سے ان مقامات کی نشاندہی عراق اور سعودی عرب کی سرحد کے قریب کی۔ رپورٹ میں یہ بھی کہا گیا کہ عراقی نائب کمانڈر مشترکہ آپریشنز لیفٹیننٹ جنرل قیس المحمدوی نے نجات اور کربلا کے قریب صحرائی علاقے میں مشتبہ نقل و حرکت کی اطلاعات کا ذکر کیا تھا۔

عراقی حکام نے کسی بھی غیر ملکی فوجی موجودگی کی اجازت دینے کی تردید کی ہے اور کہا ہے کہ اس علاقے میں کسی فورس کی تعیناتی کیلئے کوئی معاہدہ یا اجازت موجود نہیں۔