آبنائے ہرمز کھولنے کا منصوبہ۔ معاہدے میں اہم پیش رفت

امریکہ اور ایران کے درمیان جھڑپیں اتنی سنگین نہیں کہ ممکنہ معاہدے کو روک سکیں، جو بتدریج “قریب تر ہوتا جا رہا ہے۔

واشنگٹن سے الجزیرہ کی رپورٹ کے مطابق ایران اور امریکہ کے درمیان حالیہ جھڑپیں اس ممکنہ معاہدے کو متاثر کرنے کے لیے کافی نہیں ہیں، جو آہستہ آہستہ قریب آتا دکھائی دے رہا ہے۔

انہوں نے بتایا کہ ایک مفاہمتی یادداشت کے مختلف مسودے واشنگٹن میں گردش کر رہے ہیں، جن میں ایک اہم نکتہ آبنائے ہرمز کو دوبارہ کھولنا ہے۔

منصوبے کے مطابق جیسے ہی ایران اعلان کرے گا کہ آبنائے ہرمز معمول کے مطابق کھل گئی ہے، امریکہ “آپریشن اکنامک فیوری” یعنی ایرانی بندرگاہوں کی ناکہ بندی کو ختم کرنے کی طرف بڑھ سکتا ہے۔

اس دوران ایران کو تیل کی برآمدات شروع کرنے کے لیے کچھ خصوصی استثنیٰ بھی دیے جائیں گے۔

مزید یہ کہ 60 دن کا ایک عبوری دور ہوگا جس میں دونوں ممالک بڑے مسائل پر بات چیت کریں گے، جن میں ایران کا جوہری پروگرام اور افزودہ یورینیم کا مستقبل شامل ہے۔ امریکی صدر ٹرمپ نے واضح کیا ہے کہ ایران کو جوہری ہتھیار کسی صورت حاصل نہیں کرنے دیے جائیں گے۔

اس کے علاوہ یہ بھی زیر غور ہے کہ آیا ایران کو امریکہ میں منجمد اثاثوں تک رسائی دی جائے گی یا نہیں۔

رپورٹ کے مطابق ابھی مزید مذاکرات جاری ہیں اور حتمی فیصلہ صدر ٹرمپ کے اختیار میں ہوگا۔

رپورٹ کے مطابق گزشتہ 72 گھنٹوں میں امریکہ اور ایران کے درمیان چند جھڑپیں ضرور ہوئی ہیں، لیکن وہ اتنی شدید نہیں کہ مذاکرات کو روک سکیں، اور معاہدہ مزید قریب آتا دکھائی دے رہا ہے۔