کراچی میں آج گرج چمک کے ساتھ بارش کی پیش گوئی

شہر قائد میں آج رات گئے گرج چمک کے ساتھ تیز بارش ہونے کا امکان ہے۔محکمہ موسمیات کا کہنا ہے کہ آج کراچی اور سندھ کے دیگر شہروں میں ہونے والی بارش سے سردی کی شدت میں بھی اضافہ ہوگا۔

ڈائریکٹر محکمہ موسمیات عبدالرشید کے مطابق کراچی میں آج رات گئے گزشتہ ماہ جیسی تیز بارش ہونے کا امکان ہے تاہم سوشل میڈیا پر طوفان اور خطرناک بارش سے متعلق خبروں میں کوئی صداقت نہیں ہے۔

محکمہ موسمیات کے مطابق آئندہ 24 گھنٹوں کے دوران ملک کے بیشتر علاقوں میں موسم ابرآلود رہے گا۔

کراچی کے مختلف علاقوں میں گذشتہ رات ہلکی بارش ہوئی تھی جس کے باعث خنکی میں اضافہ ہوگیا تھا۔

یاد رہے کہ دو روز قبل محکمہ موسمیات کا کہنا تھا کہ ملک بھر میں بارشوں کا نیا سلسلہ آئندہ ایک ہفتے تک وقفے وقفے سے جاری رہے گا۔