سکھوں کے مذہبی جلوس کے دوران دھماکا۔دو افراد ہلاک،9 زخمی

بھارتی پنجاب کے ضلع تارن ترن کے قریبی گاﺅں میں سکھوں کے مذہبی جلوس کے دوران دھماکے کے نتیجے میں دو افراد جاں بحق اور 9 زخمی ہو گئے۔

تفصیلات کے مطابق ضلع تارن ترن کے قریبی گاﺅں ” پھووند “ میں سکھ مذہبی رسم ” نگر کیرتن “ اد اکر رہے تھے کہ اس دوران نوجوان پٹاخے چلانے میں مصروف تھے ، پٹاخوں کی چنگاریاں قریب ہی کھڑی ایک ٹرالی پرجا گریں جس میں بھاری مقدار میں پٹاخے موجود تھے۔

آگ لگنے کے باعث شدید نوعیت کا دھماکہ ہوا جس کے باعث وہاں موجود دو بچے جان کی بازی ہار گئے جبکہ 9 افراد زخمی ہوئے ۔مرنے والے بچوں کی شناخت ،17 سالہ منپریت سنگھ 12 سالہ گرپریت سنگھ کے نام سے ہوئی ہے۔

تارن ترن کے ایس ایس پی نے بتایاکہ ہے کہ واقعہ کی تحقیقات کی جارہی ہیں جبکہ ہلاک ہونے والے افراد کے اہل خانہ کو پانچ پانچ لاکھ روپے امداد دی جائے گی جبکہ تمام زخمیوں کا علاج معالجہ مفت میں کیا جائے گا۔