شاداب خان سے گلے ملنا شہری کے گلے پڑگیا

ملتان: کرکٹر شاداب خان سے گلے ملنا شہری کے گلے پڑگیا، پاک ویسٹ انڈیز دوسرے ون ڈے کے دوران گراؤنڈ میں گھسنے والا نوجوان پولیس کے حوالے کردیا گیا۔

نجی ٹی وی کے مطابق ملتان میں پاکستان اور ویسٹ انڈیز کے درمیان کھیلے جانے والے دوسرے ون ڈے میچ کے دوران گراؤنڈ میں گھسنے والے تماشائی کے خلاف مقدمہ درج کرلیا گیا ہے۔پاکستان ٹیم کی بیٹنگ کے دوران گراؤنڈ میں جنگلہ پھلانگ کر گھسنے والے وقاص نامی تماشائی کے خلاف ایف آئی آر میں دفعہ 452اور دفعہ 188 کو شامل کیا گیا ہے۔

پولیس کے مطابق محمد وقاص اشرف گراؤنڈ سے واپسی پر شائقین کی طرف بھاگا اور وہاں سے فرار ہونے کی کوشش کی جس کے باعث یہ دونوں دفعات ایف آئی آر میں شامل کی گئی ہیں۔پاکستانی اننگز کے 39ویں اوور میں ایک تماشائی میدان میں داخل ہوا اور کریز پر موجود شاداب خان کو سیلوٹ کیا جس کے بعد قومی آل راؤنڈر نے اسے گلے لگالیا تھا۔