عراقی بندرگاہ کے قریب مال بردار جہاز پر ڈرون حملہ، دھماکے کے بعد آگ بھڑک اٹھی

بغداد/دبئی: عراقی سیکیورٹی حکام کے مطابق، خلیج میں عراق کی اہم بندرگاہ ام قصر کے قریب ایک مال بردار بحری جہاز پر مبینہ ڈرون حملہ ہوا ہے، جس کے نتیجے میں جہاز پر دو شدید دھماکے ہوئے اور آگ بھڑک اٹھی۔

عراقی حکام اور بحری سیکیورٹی کے اداروں کے مطابق یہ حملہ عراقی بندرگاہی شہر ام قصر سے تقریباً 40 ناٹیکل میل (74 کلومیٹر) جنوب مشرق میں خلیج کے پانیوں میں پیش آیا۔

 ابتدائی اطلاعات کے مطابق جہاز کے دائیں حصے پر ایک نامعلوم گولہ آ کر لگا جس سے پہلا بڑا دھماکا ہوا۔ سیکیورٹی حکام کی ابتدائی تحقیقات کے مطابق اس کے فوراً بعد ہونے والا دوسرا دھماکا ایک بغیر پائلٹ کے طیارے (ڈرون) کے حملے کا نتیجہ تھا۔

دھماکوں کے باعث جہاز پر شدید آگ بھڑک اٹھی تاہم عملے کی کوششوں سے آگ پر قابو پا لیا گیا۔ خوش قسمتی سے واقعے میں کسی جانی نقصان یا عملے کے زخمی ہونے کی اطلاع نہیں ملی۔

برطانوی فوج کے تحت کام کرنے والے ادارے یو کے میری ٹائم ٹریڈ آپریشنز (UKMTO) نے بھی اس حملے کی تصدیق کی ہے۔ ادارہ برائے بحری سیکیورٹی کے مطابق جہاز کو ایک نامعلوم شے سے نشانہ بنایا گیا تھا۔ ابتدائی جائزوں کے مطابق حملے سے تاحال کسی قسم کے ماحولیاتی نقصان (جیسے تیل کے پھیلاؤ) کے شواہد نہیں ملے۔