ایران کا اچانک میزائل حملہ ناکام، تمام میزائل تباہ کر دیے گئے: امریکا

امریکی فوج نے دعویٰ کیا ہے کہ ایران کی جانب سے مشرقِ وسطیٰ میں امریکی تنصیبات کو نشانہ بنانے کی ایک اچانک میزائل کارروائی کو ناکام بنا دیا گیا اور داغے گئے تمام بیلسٹک میزائل فضائی دفاعی نظام کے ذریعے راستے ہی میں تباہ کر دیے گئے۔

امریکی فوج کی مرکزی کمان (سینٹکام) کے مطابق حملہ منگل کی شام امریکی وقت کے مطابق کیا گیا، تاہم کسی بھی امریکی فوجی اڈے یا تنصیب کو نقصان نہیں پہنچا۔ سینٹکام نے حملے کے ممکنہ اہداف کی تفصیلات جاری نہیں کیں۔

امریکی حکام کا کہنا ہے کہ اس واقعے کے ساتھ ہی ایران اور امریکا کے درمیان چند روز سے جاری نسبتاً خاموشی کا خاتمہ ہو گیا ہے، جو ممکنہ سفارتی رابطوں کے حوالے سے اہم سمجھی جا رہی تھی۔

دوسری جانب سینٹکام نے یہ بھی اعلان کیا کہ امریکا اور سعودی عرب نے مشترکہ کارروائی کرتے ہوئے مشرقی عراق میں ایران سے منسلک مسلح گروہوں کے مبینہ لاجسٹک مراکز اور اسلحہ کے ذخائر کو نشانہ بنایا۔ امریکی فوج کے مطابق یہ کارروائی حالیہ ڈرون حملوں کے جواب میں کی گئی، جن کا الزام ایران کے حمایت یافتہ گروہوں پر عائد کیا گیا ہے۔

امریکی فوج کا کہنا ہے کہ گزشتہ 72 گھنٹوں کے دوران امریکی اور سعودی مفادات کے خلاف 30 سے زائد ڈرون حملوں کی کوشش کی گئی، جن کے بعد جوابی کارروائی کا فیصلہ کیا گیا۔ سینٹکام نے خبردار کیا کہ اگر ایسے حملے جاری رہے تو مزید فوجی اقدامات بھی کیے جا سکتے ہیں۔

ادھر سعودی عرب نے بھی اپنے مشرقی علاقوں میں تیل کی تنصیبات کو نشانہ بنانے والے متعدد ڈرون مار گرانے کا دعویٰ کیا ہے۔ سعودی وزارتِ دفاع کے مطابق یہ ڈرون عراق سے داغے گئے تھے، جبکہ سعودی حکام نے اس کارروائی کا الزام ایران سے وابستہ مسلح گروہوں پر عائد کیا ہے۔

دوسری جانب ایران نے تاحال امریکی دعوؤں اور حالیہ فوجی کارروائیوں پر کوئی باضابطہ ردعمل جاری نہیں کیا۔

تازہ پیش رفت کے بعد مشرقِ وسطیٰ میں سیکیورٹی صورتحال مزید کشیدہ ہو گئی ہے، جبکہ عالمی برادری خطے میں بڑھتے ہوئے تناؤ اور ممکنہ سفارتی پیش رفت پر گہری نظر رکھے ہوئے ہے۔