ایران امریکا کشیدگی کے باوجود تیل سستا ہوگیا

امریکا اور ایران کے درمیان جاری کشیدگی کے باوجود عالمی منڈی میں خام تیل کی قیمتوں میں کمی ریکارڈ کی گئی ہے۔

بین الاقوامی میڈیا رپورٹس کے مطابق برینٹ خام تیل کی قیمت 1.29 ڈالر کمی کے بعد 89.45 ڈالر فی بیرل پر آ گئی، جبکہ امریکی ویسٹ ٹیکساس انٹرمیڈیٹ (WTI) خام تیل 56 سینٹ یا 0.66 فیصد کمی کے ساتھ 83.90 ڈالر فی بیرل پر ٹریڈ کرتا رہا۔

ماہرین کے مطابق مشرقِ وسطیٰ میں بڑھتی ہوئی جغرافیائی کشیدگی کے باوجود تیل بردار جہازوں کی معمول کے مطابق آمدورفت جاری رہنے سے سپلائی میں کسی بڑی رکاوٹ کا خدشہ پیدا نہیں ہوا، جس کے باعث عالمی منڈی میں قیمتوں پر دباؤ کم ہوا۔

یاد رہے کہ گزشتہ کاروباری سیشن میں خطے میں جنگی صورتحال کے باعث خام تیل کی قیمتوں میں نمایاں اضافہ دیکھا گیا تھا۔ اس دوران برینٹ خام تیل تقریباً 7.91 فیصد جبکہ ویسٹ ٹیکساس انٹرمیڈیٹ 6.56 فیصد اضافے کے ساتھ بند ہوا تھا۔

تجزیہ کاروں کا کہنا ہے کہ عالمی تیل کی قیمتوں کا مستقبل مشرقِ وسطیٰ کی سیکیورٹی صورتحال، سپلائی چین اور عالمی طلب میں ہونے والی تبدیلیوں پر منحصر رہے گا۔ حالیہ کمی سے یہ ظاہر ہوتا ہے کہ سرمایہ کار فی الحال تیل کی فراہمی میں فوری خلل کا امکان کم سمجھ رہے ہیں۔