پی ٹی آئی لانگ مارچ بنوں سے روانہ ہو کر کوہاٹ پہنچ چکا ہے تاہم بنوں میں موبائل انٹرنیٹ سروس تاحال معطل ہے

بنوں اورنواحی علاقوں میں موبائل فون اور انٹرنیٹ سروس کی بندش سے شہریوں کو شدید مشکلات کا سامناہے، دوسرے روز بھی موبائل سروس کی بندش پر شہریوں نے تشویش کا اظہار کرتے ہوے سروس بحال کرنے کا مطالبہ کیا ہے۔

وزیراعظم شہباز شریف کی زیر صدارت آج اہم اجلاس متوقع ہے، جس میں خیبرپختونخوا میں ایمرجنسی یا گورنر راج یا کسی اور حل کے حوالے سے مختلف آئینی و قانونی امور کا جائزہ لیا جائے گا۔ذرائع کا کہنا ہے کہ اجلاس میں خیبرپختونخوا میں ایمرجنسی یا گورنر راج سمیت دیگر آئینی و قانونی اقدامات کے مختلف پہلوؤں پر غور ہو گا۔

ذرائع کے مطابق اپوزیشن سے مذاکرات کرنے والی حکومتی کمیٹی کی بھی وزیراعظم سے ملاقات متوقع ہے، جس میں مذاکرات کی صورتحال اور خیبرپختونخوا کے موجودہ حالات پر مشاورت کی جا سکتی ہے۔

اعلیٰ سطح اجلاس میں خیبرپختونخوا میں امن و امان کی مجموعی صورتحال پر بھی تفصیلی بریفنگ متوقع ہے۔ذرائع کے مطابق وفاقی حکومت نے گورنر خیبرپختونخوا فیصل کریم کنڈی سے صوبے کی صورتحال سے متعلق رپورٹ بھی طلب کرنے کا فیصلہ کیا ہے۔ اس اجلاس کے بعد خیبرپختونخوا کے مستقبل کے انتظامی و سیاسی ڈھانچے کے حوالے سے اہم پیش رفت سامنے آنے کا امکان ہے۔

پی ٹی آئی نے اعلان کیا ہے کہ لانگ مارچ آج دن ساڑھے 12 بجے کرک سے روانہ ہوگا۔

4 اکتوبر گنڈی چوک لکی مروت سے کامیاب آغاز کے بعد آج 12 بجے انشاء اللہ پاکستان تحریکِ انصاف کا لانگ مارچ کا دوسرا مرحلہ کرک سے شروع ہوگا!#سر_بکف_میدان_میں pic.twitter.com/kIaOjcx5we

— PTI (@PTIofficial) October 5, 2026

ورکر سڑکوں پہ اسلحہ بردار اور دلیر لیڈر بم پروف بلٹ پروف سرکاری گاڑیوں میں چوہوں کیطرح چھپے ھوۓ۔
عدالت کے حکم کی کھلی خلاف ورزی ھیلی کاپٹر و سرکاری وسائل کا استعما ل اور اسلحہ بردار جلوس۔ لیڈر دلیر ھو، دو نمبر مال کھاؤ نہ ھو تو وہ ورکر کے ساتھ شانہ بہ شانہ ھوتا ھے ۔
عدالت کے… pic.twitter.com/o766u4JyIu

— Khawaja M. Asif (@KhawajaMAsif) October 5, 2026

مارچ روکنے کیلئے اسلام آباد میں تعینات اہلکاروں کی تعداد 38 ہزار ہوگئی۔ پچھلی بار 20 ہزار اہلکار تعینات کیے گئے تھے۔

وزیراعلیٰ خیبرپختونخوا محمد سہیل آفریدی نے کہا ہے کہ ان کی حکومت صوبے میں کسی نئی ملٹری کارروائی یا ڈرون حملوں کی پالیسی قبول نہیں کرے گی اور خیبرپختونخوا سے متعلق فیصلے عوام کی خواہشات کے مطابق ہونے چاہییں۔
لکی مروت میں لانگ مارچ کے شرکا سے خطاب کرتے ہوئے وزیراعلیٰ نے کہا کہ ان کی جماعت سیاست اور مذاکرات پر یقین رکھتی ہے، تاہم اسلام آباد میں ہونے والے حالیہ مذاکرات کے دوران بعض حلقوں کی جانب سے ایسے مطالبات سامنے آئے جنھیں ان کی حکومت صوبے اور عوام کے مفاد کے خلاف سمجھتی ہے۔

انہوں نے الزام عائد کیا کہ ماضی میں خیبرپختونخوا پر ایسی پالیسیاں مسلط کی جاتی رہی ہیں جن کے منفی اثرات صوبے کو بھگتنا پڑے، تاہم اب ایسا نہیں ہونے دیا جائے گا۔
ان کا کہنا تھا کہ صوبے میں پاکستان تحریک انصاف کے بانی عمران خان کے وژن اور پالیسیوں کے مطابق حکومت چلائی جائے گی۔
وزیراعلیٰ نے اپنے خطاب میں گورنر راج یا ایمرجنسی کے کسی بھی امکان کو مسترد کرتے ہوئے کہا کہ صوبے میں عوامی مینڈیٹ کی بالادستی برقرار رکھی جائے گی۔ انھوں نے شرکا سے ملٹری آپریشنز اور ڈرون حملوں کے بارے میں سوال کیا جس پر شرکا نے مخالفت کا اظہار کیا۔

سابق وزیراعلی خیبر پختونخوا علی امین گنڈاپور لانگ مارچ کا ارادہ چھوڑ کر قافلے سمیت واپس اپنی رہائشگاہ پہنچ گئے۔ علی امین گنڈاپور یارک ٹول پلازہ سے واپس روانہ ہوئے، ڈیرہ اسماعیل خان پہنچنے پر انہوں نے کہا کہ ہم قانون ہاتھ میں نہیں لیں گے۔ انہوں نے لانگ مارچ میں شرکت کے لیے گنڈی چوک پہنچنا تھا لیکن یارک ٹول پلازہ کو کنٹینرز لگا کر بند کیا گیا تھا۔

سوشل میڈیا پر جاری آڈیو بیان میں علی امین گنڈاپور کا کہنا تھا کہ آج جب ہم روانہ ہوئے تو ہمیں پولیس نے روک لیا اور کہا کہ آپ لوگوں کو جانے کی اجازت نہیں ہے، دفعہ 144 نافذ ہے۔ جس پر ہم نے اپنی انتظامیہ سے رابطہ کیا، وزیراعلی سیکرٹریٹ سے رابطہ کیا۔ وزیراعلی چونکہ خود لانگ مارچ میں ہیں تو ان سے ہمارا رابطہ نہیں ہوا لیکن باقی جو رابطے ہوئے تو اس میں انہوں نے ہمیں صاف کہہ دیا کہ یہ دفعہ 144 تین دن کے لیے ہے، اس کے بعد ہم وہاں پر بیٹھے رہے، انتظار کرتے رہے کہ کوئی لائحہ عمل آ جائے، کیونکہ ہمیں لائحہ عمل دیا گیا تھا کہ آپ نے بالکل قانون کو ہاتھ میں نہیں لینا، پرامن رہنا ہے، کسی طرح کا تصادم نہیں کرنا اور پرامن رہنا ہے اور یہ ہدایت ہمیں وزیراعلی سے اور پارٹی کی طرف سے ہمیں آئی تھی۔

علی امین گنڈاپور کا کہنا تھا کہ ہم وہاں پہ کافی گھنٹے تک رہے، رابطے کرتے رہے، اس کے بعد رات ہوگئی اور جب کچھ جواب نہیں آیا تو چونکہ اس جگہ پہ جہاں ہمیں روکا ہوا تھا، وہ ایریا بالکل سکیورٹی کے لحاظ سے کلیئر نہیں تھا، تو یہی مشورہ ہوا کہ بجائے ہم یہاں پر رہیں اس کے بجائے نئے احکامات جب تک نہیں آتے ہم لوگ وہاں سے واپس آگئے اور اب جو بھی پارٹی کے احکامات آئیں گے ہم اس کے پابند ہیں اور انشاءاللہ تیار ہیں۔ ان کا کہنا تھا کہ ہم پارٹی کے احکامات کے منتظر ہیں، ہماری تیاری مکمل ہے اور ہم اس انتظار میں رہیں گے کہ کیا احکامات آتے ہیں۔

اسلام آباد پولیس نے واضح کیا ہے کہ دارالحکومت کی تمام اہم شاہراہیں، داخلی و خارجی راستے اور ایم ٹو موٹروے اسلام آباد تا لاہور ہر قسم کی ٹریفک کے لیے کھلی ہیں۔

پولیس کی جانب سے شہریوں کو ہدایت کی گئی ہے کہ وہ دوران سفر ٹریفک قوانین کی مکمل پابندی کریں۔

اکستان تحریکِ انصاف نے عمران خان سے پارٹی رہنماؤں کی ملاقات اور علاج سمیت دیگر مطالبات کے لیے خیبر پختونخوا کے ضلع لکی مروت سے لانگ مارچ کا آغاز کیا۔ پہلے روز کے اختتام پر لانگ مارچ کے شرکا نے بنوں اور کرک کی سرحد پر واقع ختم نبوت چوک پر اپنا پہلا پڑاؤ ڈال دیا ہے۔
پی ٹی آئی کا کہنا ہے کہ پیر سے لانگ مارچ کا دوبارہ آغاز ہوگا اور یہ مختلف اضلاع سے ہوتا ہوا صوابی اور پھر پشاور پہنچے گا۔
پہلے روز لانگ مارچ کے شرکا سے خطاب کرتے ہوئے وزیرِ اعلی سہیل آفریدی نے کہا کہ ہم ہر روز ایک نئے منصوبے کا اعلان کریں گے۔