اسرائیلی اپوزیشن کا نیتن یاہو کو اقتدار سے ہٹانے کا اعلان، پارلیمان میں اہم شکست
سیاسی بحران گہرا ہو گیا، اپوزیشن رہنما نے حکومت سازی کا عزم ظاہر کر دیا، پارلیمنٹ میں اسپیکر کا اہم عہدہ بھی ہاتھ سے نکل گیا
اسرائیلی اپوزیشن کا نیتن یاہو کو اقتدار سے ہٹانے کا اعلان، پارلیمان میں اہم شکست
اسرائیلی سیاست میں طوفان برپا ہو گیا ہے جہاں اپوزیشن رہنما گادی آئزن کوٹ نے وزیراعظم بنجمن نیتن یاہو کو وزارت عظمیٰ سے ہٹانے کا باضابطہ اعلان کر دیا ہے۔ غیر ملکی خبر رساں اداروں کے مطابق اسرائیلی پارلیمان ’کنیسٹ‘ میں حکمراں جماعت کو اس وقت شدید ترین دھچکا لگا جب اپوزیشن اتحاد کے امیدوار متان کہانا کو 66 ووٹ دے کر نیا اسپیکر منتخب کر لیا گیا، جبکہ نیتن یاہو کی جماعت لیکوڈ کے امیدوار اوفیر کاٹز صرف 52 ووٹ حاصل کر سکے۔ اس شکست کے نتیجے میں نیتن یاہو کے قریبی ساتھی امیر اوہانا اسپیکر کے عہدے سے محروم ہو گئے ہیں۔
رپورٹس کے مطابق اسپیکر کے اس انتہائی اہم انتخاب کے دوران 6 گھنٹے تک طویل رکاوٹیں اور تاخیری حربے استعمال کیے گئے، تاہم عرب جماعتوں کے کلیدی کردار اور فیصلوں کی بدولت اپوزیشن یہ معرکہ سر کرنے میں کامیاب رہی۔ نئے اسپیکر کے انتخاب سے اپوزیشن کو قانون سازی کے ایجنڈے اور اہم معاملات پر ووٹنگ کے شیڈول میں فیصلہ کن برتری حاصل ہو گئی ہے، جس کی مدد سے وہ عدالتی اصلاحات سمیت اپنے تمام ترجیحی اقدامات کو تیزی سے آگے بڑھا سکیں گے۔
یاد رہے کہ گزشتہ ماہ ہونے والے عام انتخابات میں نیتن یاہو کا حامی بلاک پارلیمانی اکثریت کھو بیٹھا تھا اور 120 رکنی کنیسٹ میں ان کے اتحاد کو صرف 53 نشستیں مل سکیں، جبکہ گادی آئزن کوٹ کے اتحاد نے 48 نشستیں حاصل کیں۔ ان انتخابات میں عرب جماعتوں کی جانب سے حاصل کردہ 19 نشستیں حکومت سازی میں فیصلہ کن ثابت ہوئیں، جن کی مدد سے اپوزیشن کو یہ تاریخی برتری ملی ہے۔
حالیہ سیاسی پیش رفت کے بعد اسرائیلی صدر اسحاق ہرزوگ نے گادی آئزن کوٹ کو نئی حکومت بنانے کی دعوت دے دی ہے۔ دوسری جانب اپوزیشن رہنما گادی آئزن کوٹ نے واضح کیا ہے کہ حکومت سازی کے لیے اتحادی جماعتوں کے ساتھ جاری مذاکرات کو مزید طول نہیں دیا جائے گا، اور وقت آنے پر نئی حکومت کی حتمی منظوری کے لیے پارلیمان سے فوری طور پر رجوع کیا جائے گا۔