کراچی میں سپر ہائی وے پر کار حادثہ، ایم کیو ایم رہنما کے قافلے کے 4 افراد زخمی

تیز رفتار گاڑی ٹرک سے ٹکرا گئی، زخمیوں کو نجی اسپتال منتقل کر دیا گیا

November 21, 2026 · قومی
کراچی میں سپر ہائی وے پر کار حادثہ، ایم کیو ایم رہنما کے قافلے کے 4 افراد زخمی

کراچی میں سپر ہائی وے پر کار حادثہ، ایم کیو ایم رہنما کے قافلے کے 4 افراد زخمی

کراچی میں سپر ہائی وے (ایم نائن موٹروے) پر عثمانیہ ریسٹورنٹ کے قریب ایک تیز رفتار کار سڑک کنارے کھڑے ٹرک سے ٹکرا گئی، جس کے نتیجے میں گاڑی میں سوار 4 افراد شدید زخمی ہو گئے۔

میڈیا رپورٹس اور ریسکیو ذرائع کے مطابق حادثے کا شکار ہونے والی کار متحدہ قومی موومنٹ (ایم کیو ایم) پاکستان کے رہنما انیس قائمخانی کے قافلے کا حصہ تھی۔ حادثے کی اطلاع ملتے ہی چھیپا کے رضا کار فوری طور پر موقع پر پہنچ گئے اور تمام زخمیوں کو ایمبولینس کے ذریعے سپر ہائی وے پر واقع ایک نجی اسپتال منتقل کیا۔

اسپتال ذرائع کا کہنا ہے کہ زخمیوں میں سے 2 افراد کی حالت تشویشناک ہے، جنہیں فوری طبی امداد کے بعد اسٹیڈیم روڈ پر واقع ایک اور نجی اسپتال منتقل کر دیا گیا ہے۔ ابتدائی معلومات کے مطابق زخمی ہونے والے افراد میں ایم کیو ایم پاکستان کے کارکنان عبید اور نبیل بھی شامل ہیں، جبکہ دیگر 2 افراد کی شناخت تاحال نہیں ہو سکی ہے۔ پولیس اور متعلقہ ادارے واقعے کی مزید تفتیش کر رہے ہیں۔