پہلے ٹی ٹوئنٹی میں آسٹریلیا نے ریکارڈ ہدف عبور کرکے انگلینڈ کو ہرا دیا
میلبرن کا میدان، آسٹریلیا نے سنسنی خیز مقابلے کے بعد کامیابی سمیٹ لی، سیریز میں ایک صفر کی برتری حاصل ہوگئی۔
پہلے ٹی ٹوئنٹی میں آسٹریلیا نے ریکارڈ ہدف عبور کرکے انگلینڈ کو ہرا دیا
آسٹریلیا نے پہلے ٹی ٹوئنٹی میچ میں ایک ریکارڈ ساز ہدف کامیابی کے ساتھ عبور کرتے ہوئے انگلینڈ کو 3 وکٹوں سے شکست دے دی۔ میلبرن میں کھیلے گئے اس میچ میں آسٹریلیا نے ٹاس جیت کر پہلے فیلڈنگ کرنے کا فیصلہ کیا اور انگلینڈ کو بیٹنگ کی دعوت دی۔
میچ کے دوران انگلینڈ نے میلبرن کے میدان میں ٹی ٹوئنٹی انٹرنیشنل کرکٹ کا سب سے بڑا اسکور اسکور بورڈ کی زینت بنایا۔ انگلش کپتان ہیری بروک نے جارحانہ انداز اپناتے ہوئے 28 گیندوں پر 65 رنز کی شاندار اننگز کھیلی، جس کی بدولت انگلینڈ نے مقررہ 20 اوورز میں 9 وکٹوں کے نقصان پر 187 رنز بنائے۔ آسٹریلیا کی جانب سے نکھل چوہدری اور جیک ایڈورڈز نے عمدہ بولنگ کا مظاہرہ کرتے ہوئے 2،2 وکٹیں حاصل کیں۔
ہدف کے تعاقب میں آسٹریلیا نے سنسنی خیز مقابلے کے بعد مطلوبہ ہدف 7 وکٹوں کے نقصان پر صرف ایک گیند قبل ہی حاصل کر لیا۔ نکھل چوہدری نے 38 گیندوں پر 66 رنز کی ذمہ دارانہ اننگز کھیلی جبکہ سیم ہارپر نے 15 گیندوں پر 32 اور جیک ایڈورڈز نے 11 گیندوں پر ناقابل شکست 25 رنز بنا کر نمایاں پوزیشن سنبھالی۔ انگلینڈ کی طرف سے ول جیکس نے 2 کھلاڑیوں کو آؤٹ کیا۔ اس کامیابی کے ساتھ ہی آسٹریلیا کو 5 میچوں کی اس سیریز میں ایک صفر کی برتری حاصل ہو گئی ہے۔