آبنائے ہرمز ریڈ لائن ہے، خطے کا انفراسٹرکچر تباہ کر دیں گے، ایران کی دھمکی

شمالی عراق کے کردستان ریجن کے شہر اربیل کے اوپر امریکی اتحادی افواج نے آٹھ دھماکہ خیز ڈرون مار گرائے ہیں۔

عراقی خبر رساں ادارے (INA) کے مطابق کرد انسداد دہشت گردی فورسز نے بتایا کہ امریکی اتحادی افواج نے بروقت کارروائی کرتے ہوئے ان بارودی ڈرونز کو ہدف تک پہنچنے سے پہلے ہی تباہ کر دیا۔

بیان میں مزید کہا گیا ہے کہ اس واقعے میں کسی جانی نقصان یا زخمی ہونے کی اطلاع نہیں ملی، جبکہ مزید تفصیلات جاری نہیں کی گئیں۔

شمالی عراق کے کردستان ریجن کے شہر سلیمانیہ میں چار زور دار دھماکوں کی اطلاعات موصول ہوئی ہیں۔

کرد خبر رساں پلیٹ فارم رووداو کے مطابق شہر کے مختلف علاقوں میں یکے بعد دیگرے چار شدید دھماکوں کی آوازیں سنی گئیں، جس کے باعث علاقے میں خوف و ہراس پھیل گیا۔

ابتدائی طور پر دھماکوں کی نوعیت، مقام، یا ممکنہ جانی و مالی نقصان کے بارے میں کوئی سرکاری تفصیلات جاری نہیں کی گئی ہیں۔

مزید معلومات سامنے آنے پر صورتحال سے متعلق تازہ تفصیلات جاری کیے جانے کا امکان ہے۔

ایرانی فوج نے دعویٰ کیا ہے کہ اس نے کویت میں امریکی فوج کی تعیناتی کے مقامات اور لاجسٹک سپورٹ مراکز کو ڈرون حملوں کا نشانہ بنایا ہے۔

ایرانی خبر رساں ایجنسی فارس نیوز کے مطابق جاری بیان میں فوج نے کہا کہ کویت میں موجود امریکی فوجی تنصیبات اور رسد فراہم کرنے والے مراکز پر ڈرون کارروائیاں کی گئیں۔

بیان میں مزید کہا گیا کہ ہم اپنی تاریخ، عوامی حمایت، تجربے اور جنگی تیاری پر بھروسہ کرتے ہوئے ہر قسم کے دباؤ اور دھمکی کا پوری چوکسی اور طاقت کے ساتھ مقابلہ کریں گے۔

ایران کی نیم سرکاری خبر رساں ایجنسی فارس نیوز نے ہرمزگان صوبے کی گورنری کے حوالے سے بتایا ہے کہ امریکی فضائی حملوں میں جنوبی ایرانی صوبے ہرمزگان کے پانچ پلوں کو نشانہ بنایا گیا ہے۔

گورنری کے مطابق حملوں میں صوبے کے مختلف مقامات پر واقع پانچ پل متاثر ہوئے، تاہم فوری طور پر جانی یا مالی نقصان کی مزید تفصیلات جاری نہیں کی گئیں۔

قطر کی وزارت دفاع نے کہا ہے کہ ملک کی مسلح افواج اس وقت متعدد فضائی حملوں کو ناکام بنانے کے لیے دفاعی کارروائیاں کر رہی ہیں۔

وزارت دفاع کے جاری بیان کے مطابق قطری فضائی دفاعی نظام مکمل طور پر متحرک ہے اور ملک کی فضائی حدود کی حفاظت کے لیے آنے والے فضائی خطرات کو روکنے کی کارروائیاں جاری ہیں۔

امریکہ نے ایک بار پھر ایران کی چاہ بہار بندرگاہ پر واقع میری ٹائم کنٹرول ٹاور کو میزائل حملے کا نشانہ بنایا ہے۔

ایرانی میڈیا کی رپورٹ کے مطابق گزشتہ ایک ہفتے کے دوران اس بحری کنٹرول ٹاور پر یہ تیسرا امریکی حملہ ہے۔ حملے کے نتیجے میں ہونے والے نقصانات یا ممکنہ جانی نقصان کی تفصیلات فوری طور پر جاری نہیں کی گئیں۔

ایرانی میڈیا کے مطابق حالیہ حملہ خطے میں جاری کشیدگی کے دوران حساس بحری تنصیبات پر ہونے والی مسلسل امریکی کارروائیوں کا حصہ ہے۔

قطر کی وزارت داخلہ نے تصدیق کی ہے کہ ایران کے آج صبح کیے گئے حملے کے بعد میزائل روکنے کی کارروائی کے دوران گرنے والے ملبے (شیل کے ٹکڑوں) سے ایک بچہ زخمی ہوگیا۔

وزارت داخلہ کے بیان میں کہا گیا ہے کہ موصولہ اطلاعات کے مطابق ایک بچہ گرنے والے ملبے سے زخمی ہوا، جسے فوری طور پر طبی امداد فراہم کی جا رہی ہے اور اس کی حالت پر نظر رکھی جا رہی ہے۔

بیان میں عوام پر زور دیا گیا کہ معلومات صرف سرکاری ذرائع سے حاصل کریں اور افواہوں، غیر مصدقہ خبروں، تصاویر یا ویڈیوز کی تشہیر سے گریز کریں تاکہ قانونی کارروائی سے بچا جا سکے۔