ایران اور امریکہ میں مذاکرات کرانے فیلڈ مارشل عاصم منیر تہران پہنچ گئے

بیروت/تل ابیب : جنوبی لبنان میں جاری گھمسان کی لڑائی کے دوران حزب اللہ کے راکٹ حملوں میں 5 اسرائیلی فوجی زخمی ہو گئے ہیں۔ اسرائیلی فوج نے باضابطہ طور پر تصدیق کی ہے کہ زخمیوں میں سے ایک فوجی کی حالت انتہائی نازک ہے۔

اسرائیلی فوج نے سماجی رابطے کی ویب سائٹ ‘ایکس’ (ٹویٹر) پر جاری کردہ اپنے بیان میں بتایا کہ جنوبی لبنان میں راکٹ باری کے نتیجے میں ایک فوجی “شدید زخمی” جبکہ چار دیگر معمولی زخمی ہوئے ہیں۔ اگرچہ فوج نے مقام کی تفصیلات جاری نہیں کیں، تاہم اسرائیلی میڈیا اور ملٹری ریڈیو کے مطابق یہ واقعہ جنوبی لبنان کے سرحدی علاقے بنت جبیل میں پیش آیا۔

رپورٹس کے مطابق بنت جبیل اور اس کے گردونواح میں اس وقت اسرائیلی فوج اور حزب اللہ کے جنگجوؤں کے درمیان شدید جھڑپیں جاری ہیں۔ حزب اللہ کی جانب سے سرحدی علاقوں میں اسرائیلی پیش قدمی روکنے کے لیے مسلسل راکٹ حملے اور اینٹی ٹینک میزائلوں کا استعمال کیا جا رہا ہے، جس کے باعث قابض فوج کو جانی اور مالی نقصان کا سامنا ہے۔

دوسری جانب اسرائیل کے وزیر اعظم بنجمن نیتن یاہو نے دعویٰ کیا ہے کہ اسرائیلی فوج جنوبی لبنان کے اسٹریٹجک اہمیت کے حامل قصبے بنٹ جبیل کو فتح کرنے کے بالکل قریب پہنچ چکی ہے۔

سماجی رابطے کی ویب سائٹ ‘ایکس’ پر جاری کردہ ایک ویڈیو پیغام میں نیتن یاہو نے کہا کہ کئی روز سے جاری شدید جھڑپوں کے بعد اسرائیلی فوج اب بنٹ جبیل پر مکمل کنٹرول حاصل کرنے کے دہانے پر ہے۔ انہوں نے اس پیش رفت کو حزب اللہ کے خلاف جاری مہم میں ایک بڑی کامیابی قرار دیا۔

واشنگٹن:امریکی سینیٹ نے صدر ڈونلڈ ٹرمپ کے ایران کے خلاف بلا اجازت جنگ جاری رکھنے کے اختیارات کو محدود کرنے سے متعلق اہم قرارداد مسترد کر دی ہے۔
ریپبلکن اکثریتی سینیٹ میں ہونے والی اس رائے شماری میں قرارداد کے خلاف 52 جبکہ حق میں 47 ووٹ آئے۔

بدھ کے روز ہونے والی اس ووٹنگ میں زیادہ تر ارکان نے اپنی پارٹی پالیسی کے مطابق ووٹ دیا، تاہم کچھ استثنیٰ بھی دیکھنے میں آئے۔

ریپبلکن سینیٹر رینڈ پال نے اپنی پارٹی کے خلاف جا کر ڈیموکریٹس کی اس قرارداد کی حمایت کی۔ڈیموکریٹک سینیٹر جان فیٹرمین نے اپنی جماعت کے برعکس قرارداد کی مخالفت میں ووٹ دیا۔

ڈیموکریٹس کی جانب سے پیش کی گئی اس قرارداد کا مقصد صدر ٹرمپ کو پابند کرنا تھا کہ وہ ایران کے خلاف کسی بھی قسم کی مزید فوجی کارروائی سے قبل کانگریس سے باقاعدہ منظوری حاصل کریں۔

اپوزیشن کا موقف ہے کہ ایران کے خلاف جاری “آپریشن ایپک فیوری” (Operation Epic Fury) کے لیے صدر نے آئینی طریقہ کار کو نظر انداز کیا ہے۔

بیروت: جنوبی لبنان کے قصبے میفدون میں اسرائیلی فضائیہ نے ہولناک کارروائی کرتے ہوئے امدادی کارکنوں کو نشانہ بنایا، جس کے نتیجے میں 4 پیرامیڈیکس جاں بحق اور 6 زخمی ہو گئے۔

لبنان کی سرکاری نیوز ایجنسی کے مطابق، یہ واقعہ اس وقت پیش آیا جب پیرامیڈیکس کی ٹیمیں نبطیہ کے قریب واقع قصبے میفدون میں سابقہ فضائی حملے کے زخمیوں کو بچانے کی کوشش کر رہی تھیں۔

پہلا حملہ: جب پہلی ایمبولینس جائے وقوعہ پر پہنچی، اسے نشانہ بنایا گیا۔

دوسرا حملہ: پہلی ٹیم کی مدد کے لیے جب دوسری ایمبولینس پہنچی، تو اس پر بھی بمباری کی گئی۔

تیسرا حملہ: تیسری ٹیم کے پہنچنے پر دوبارہ حملہ کیا گیا تاکہ ریسکیو کے عمل کو مکمل طور پر روک دیا جائے۔

لبنانی وزارتِ صحت نے اس حملے کی شدید الفاظ میں مذمت کرتے ہوئے اسے “واضح جنگی جرم” قرار دیا ہے۔

وزارت کے ترجمان کا کہنا تھا یہ کارروائی اسرائیلی دشمن کے اس پختہ ارادے کی عکاسی کرتی ہے کہ وہ پیرامیڈیکس کو کسی بھی قیمت پر ان کا زندگی بچانے والا فرض ادا کرنے سے روکنا چاہتا ہے۔

2 مارچ سے شروع ہونے والی اس حالیہ جنگ کے بعد سے لبنانی طبی عملے پر حملوں میں اب تک لبنان میں 91 ہیلتھ کیئر ورکرز اسرائیلی حملوں میں جاں بحق ہو چکے ہیں۔

انقرہ: ترکیہ کے صدر رجب طیب اردوان نے کہا ہے کہ اسرائیل کو امریکا ایران جنگ بندی سبوتاژ کرنے کی اجازت نہیں ملنی چاہیے۔ نیتن یاہو کی حکومت جنگ بندی کے عمل سے ناخوش ہے۔

انہوں نے کہا کہ ترکیہ امریکا اور ایران کے درمیان کشیدگی کم کرنے، جنگ بندی میں توسیع اور پاکستان میں اگلے امن مذاکرات کے انعقاد کو یقینی بنانے کے لیے ہر ممکن اقدامات اور ضروری اپیلیں کر رہا ہے۔

ترک صدر نے کہا کہ مجھے امید ہے کہ امریکا اور ایران میں اختلافات کے باوجود مذاکرات جاری رہیں گے۔ جنگ بندی کے نتیجے میں امن کی جو امید پیدا ہوئی ہے اس کے فوائد حاصل کیے جانے چاہئیں۔

رجب طیب اردوان نے کہا کہ لبنان پر جاری اسرائیلی حملے امن کی امیدوں کو معدوم کر رہے ہیں۔ ترکیہ اپنے ان بھائیوں کے حقوق کا دفاع کرتا رہے گا جن کی، غرب اردن میں زمین پر قبضہ کیا گیا ہے۔

وزشنگٹن: ترجمان وائٹ ہاؤس کیرولین لیویٹ نے کہا ہے کہ ایران سے مذاکرات میں پاکستان واحد ثالث ہے۔

وائٹ ہاؤس میں پریس کانفرنس کرتے ہوئے کیرولین لیویٹ کا کہنا تھا کہ ایران اور امریکا جنگ بندی سے متعلق پاکستان کی سنجیدہ کوششوں کو سراہتے ہیں۔

انہوں نے کہا کہ ایران کے ساتھ بات چیت نتیجہ خیز اور جاری ہے۔ مذاکرات کا اگلا مرحلہ ممکنہ طور پر اسلام آباد میں ہوگا۔

انہوں نے مزید کہا کہ ایران سے مذاکرات میں پاکستان واحد ثالث ہے۔

ترجمان وائٹ ہاؤس کا کہنا تھا کہ امریکا کی جانب سے جنگ بندی میں توسیع کی درخواست کی خبریں غلط ہیں۔

لندن: برطانیہ کے وزیرِ اعظم کیئر سٹارمر نے واضح کیا ہے کہ وہ ایران کے خلاف جاری جنگ میں شامل ہونے کے لیے دباؤ کے آگے نہیں جھکیں گے۔

پارلیمنٹ میں خطاب کرتے ہوئے سٹارمر نے کہا یہ ہماری جنگ نہیں ہے۔ مجھ پر پالیسی تبدیل کرنے کے لیے کافی دباؤ ڈالا گیا ہے، اور اس دباؤ میں گذشتہ رات پیش آنے والے واقعات بھی شامل ہیں۔

انھوں نے مزید کہا میں اپنا فیصلہ تبدیل نہیں کروں گا۔ میں دباؤ کے آگے نہیں جھکوں گا۔ اس جنگ میں شامل ہونا ہمارے قومی مفاد میں نہیں ہے، اور ہم ایسا نہیں کریں گے۔ مجھے معلوم ہے کہ میرا مؤقف کیا ہے۔

سٹارمر کے یہ بیانات ایک ایسے وقت میں سامنے آئے ہیں جب امریکی صدر ڈونلڈ ٹرمپ نے ایک انٹرویو میں کہا تھا کہ امریکہ اور برطانیہ کے درمیان گذشتہ سال طے پانے والے تجارتی معاہدے کی شرائط ’تبدیل کی جا سکتی ہیں‘۔

تہران: ایران کی سرکاری خبر ایجنسیوں کے مطابق، ایران نے کہا ہے کہ وہ امریکہ کے ساتھ آئندہ دور کے مذاکرات کے بارے میں فیصلہ پاکستانی وفد سے ملاقات کے بعد کرے گا۔

ایران کی پاسدارانِ انقلاب سے وابستہ خبر رساں ایجنسی تسنیم کے مطابق، امریکہ اور اسرائیل کی جانب سے لبنان کے ساتھ جنگ بندی پر اتفاق کو ایران کے لیے آئندہ مذاکرات کے حوالے سے ایک ’مثبت اشارہ‘ سمجھا جا رہا ہے۔

تاہم رپورٹ میں کہا گیا ہے کہ امریکہ کو مذاکرات کے لیے ’معقول فریم ورک‘ اپنانا ہوگا، زیادہ مطالبات کے ذریعے مذاکراتی عمل کو نہیں روکنا چاہیے اور جنگ بندی سے پہلے کیے گئے وعدوں کی خلاف ورزی نہیں کرنی چاہیے۔

تسنیم نے مزید کہا کہ امریکی میڈیا رپورٹس میں واشنگٹن کی مذاکرات شروع کرنے کی خواہش کا ذکر ہے، لیکن ایرانی وفد نے اس بات پر زور دیا ہے کہ امریکہ کو ’منصفانہ اور معقول مذاکرات‘ کے لیے ضروری اصولوں کی پابندی کرنی ہوگی۔

یار رہے امریکہ ایران کے ساتھ دوسرے دور کے مذاکرات پر بات کر رہا ہے، لیکن ابھی تک کوئی تاریخ طے نہیں ہوئی۔

واشنگٹن: امریکی صدر ڈونلڈ ٹرمپ نے دعویٰ کیا ہے کہ چین نے ایران کو ہتھیار نہ بھیجنے پر اتفاق کر لیا ہے۔

واشنگٹن ڈی سی میں وائٹ ہاؤس کے اوول آفس کے باہر میڈیا سے گفتگو کرتے ہوئے ٹرمپ نے کہا کہ انھوں نے چینی صدر شی جن پنگ کو خط لکھ کر اس معاملے پر درخواست کی تھی۔

ٹرمپ نے اپنے سوشل میڈیا پلیٹ فارم ’ٹروتھ سوشل‘ پر ایک بیان میں کہا چین اس بات پر بہت خوش ہے کہ میں آبنائے ہرمز کو مستقل طور پر کھول رہا ہوں۔ میں یہ ان کے لیے بھی کر رہا ہوں اور پوری دنیا کے لیے بھی۔

انھوں نے مزید کہایہ صورتحال دوبارہ کبھی پیش نہیں آئے گی۔ انھوں نے اتفاق کیا ہے کہ وہ ایران کو ہتھیار نہیں بھیجیں گے۔

اپنے بیان میں ٹرمپ نے یہ بھی کہا کہ امریکہ اور چین اس معاملے پر ’دانشمندی اور بہترین طریقے سے‘ مل کر کام کر رہے ہیں، تاہم انھوں نے خبردار کیا کہ اگر ضرورت پڑی تو امریکہ لڑنے کی بھرپور صلاحیت بھی رکھتا ہے۔

دوسری جانب، چین نے منگل کے روز ایرانی بندرگاہوں پر امریکی بحری ناکہ بندی کو ’غیر ذمہ دارانہ‘ قرار دیتے ہوئے کہا کہ اس سے جنگ بندی متاثر ہو سکتی ہے۔

چینی وزارت خارجہ کے ترجمان نے ان خبروں کو بھی مسترد کر دیا جن میں کہا گیا تھا کہ چین ایران کو جدید فضائی دفاعی نظام فراہم کرنے کی تیاری کر رہا ہے، اور انھیں ’مکمل طور پر بے بنیاد‘ قرار دیا۔

بیروت: حزب اللہ کے ترجمان اور رکن پارلیمنٹ ابراہیم موسوی نے کہا ہے کہ ایران اور خطے کے دیگر ممالک کی سفارتی کوششوں کے نتیجے میں لبنان میں بہت جلد جنگ بندی عمل میں آ سکتی ہے۔

خبر رساں ادارے ’رائٹرز‘ سے گفتگو کرتے ہوئے انہوں نے امید ظاہر کی کہ جاری کشیدگی کو ختم کرنے کے لیے کی جانے والی کوششیں مثبت سمت میں آگے بڑھ رہی ہیں۔

دوسری جانب، لبنان کے دو سینئر سرکاری حکام نے بھی تصدیق کی ہے کہ جنگ بندی کے لیے پسِ پردہ کوششیں تیز کر دی گئی ہیں۔ اگرچہ ان حکام نے جنگ بندی کے باقاعدہ آغاز کی کوئی حتمی تاریخ یا اس کے دورانیے کے بارے میں تفصیلات فراہم نہیں کیں، تاہم ان کا کہنا تھا کہ اس حوالے سے پیش رفت ہو رہی ہے۔

رپورٹ کے مطابق، لبنانی حکام کا ماننا ہے کہ لبنان میں جنگ بندی کا استحکام براہِ راست امریکہ اور ایران کے درمیان جاری حالیہ مفاہمت اور ممکنہ معاہدے سے جڑا ہوا ہے۔

حکام کا کہنا ہے کہ لبنان میں امن کا دورانیہ اس بات پر منحصر ہوگا کہ امریکہ اور ایران کے درمیان طے پانے والی جنگ بندی کب تک برقرار رہتی ہے۔

تہران: ایران جنگ پر نظر رکھنے والی ویب سائٹ ’ایران وار کاسٹ ٹریکر‘ ویب سائٹ کے مطابق امریکا نے ایران کے خلاف 46 روزہ فوجی مہم کے دوران 51.2 ارب ڈالر سے زائد خرچ کیے۔

رپورٹ کے مطابق پینٹاگون کی جانب سے 10 مارچ کو امریکی کانگریس میں پیش کی گئی دستاویز میں اس فوجی مہم کے مالی حجم کی تفصیلات فراہم کی گئی ہیں۔

دستاویز کے مطابق جنگ کے پہلے ہفتے میں ہی 11.3 ارب ڈالر خرچ ہوئے، جبکہ اس کے بعد روزانہ کے اخراجات تقریباً ایک ارب ڈالر تک پہنچ گئے ہیں۔

ویب سائٹ کے مطابق ایران جنگ میں امریکا اور فی سیکنڈ 11 ہزار 500 ڈالر سے زائد کے اخراجات برداشت کرنے پڑرہے ہیں۔

اسلام آباد: وزیر دفاع خواجہ آصف کا کہنا ہے دعا ہے کہ امریکا ایران مذاکرات کا دوسرا راؤنڈ کامیاب ہو، خواہش ہے کہ ایران لبنان اور فلسطین کے حقوق پامال نہ ہوں۔

میڈیا سے گفتگو کے دوران خواجہ آصف کا کہنا تھا کہ وزیراعظم اور فیلڈ مارشل کی حکمت عملی کے باعث عالمی سطح پر پاکستان کا تشخص بہتر ہوا۔ ایسے موڑ پر ہیں کہ ساری دنیا کی نظریں پاکستان پر ہیں۔ دعا ہے کہ ایران امریکا مذاکرات کا دوسرا راؤنڈ کامیاب ہو۔

اس موقع پر ایک صحافی نے خواجہ آصف سے سوال کیا کہ خبریں ہیں کہ پاکستان ایئر فورس کے جہاز سعودی عرب پہنچ گئے ہیں۔ جس پر انہوں نے کہا کہ یہ سٹریٹجک معاملہ ہے اس کا جواب نہیں دے سکتا۔

لبنان میں حزب اللہ نے دعویٰ کیا ہے کہ اس نے آج صبح مقامی وقت کے مطابق 8 بجے شمالی اسرائیل میں راکٹ حملے کیے۔

حزب اللہ کے مطابق میتولا، کفر گلعادی اور کریات شمونہ کی بستیوں کو راکٹوں سے نشانہ بنایا گیا۔

جنوبی لبنان میں اسرائیل کی جانب سے ڈرون اور فضائی حملے کیے گئے ہیں۔
زمینی ذرائع کے مطابق صیدا ضلع کے علاقے البابلیہ میں ایک اسرائیلی ڈرون نے حملہ کیا، جبکہ اسی دوران قلیلہ کے علاقے میں بھی فضائی حملہ کیا گیا ہے۔
ان حملوں میں جانی و مالی نقصان کی تفصیلات فوری طور پر سامنے نہیں آ سکیں۔

لبنان میں بیروت کے قریب اسرائیلی حملوں میں گاڑیوں کو نشانہ بنایا گیا ہے۔
رپورٹس کے مطابق ماؤنٹ لبنان کے علاقوں سعدیات اور الجیہ میں دو گاڑیوں پر فضائی حملے کیے گئے، جو بیروت سے تقریباً 20 کلومیٹر جنوب میں واقع ہیں۔
اس کے علاوہ جنوبی لبنان کے علاقے نباطیہ الفوقا میں بھی ایک فضائی حملہ کیا گیا ہے۔

جنوبی لبنان میں اسرائیل کی جانب سے فضائی حملوں کا سلسلہ جاری ہے، جہاں آج صبح متعدد علاقوں کو نشانہ بنایا گیا۔
رپورٹس کے مطابق قدمس اور انصاریہ کے علاوہ بنت جبیل، محمودیہ، مجدل، قلیلہ، زبقین اور یاطر کے علاقوں میں بھی اسرائیلی فضائی حملے کیے گئے ہیں۔
ان حملوں میں جانی و مالی نقصان کی تفصیلات ابھی سامنے نہیں آئی ہیں، جبکہ مزید معلومات موصول ہونے پر صورتحال واضح ہونے کی توقع ہے۔

اسرائیلی نشریاتی ادارے چینل 12 کے مطابق آج صبح لبنان سے شمالی اسرائیل کے علاقے گلیلی کی طرف 20 راکٹ فائر کیے گئے۔
رپورٹ میں کہا گیا ہے کہ ان راکٹوں میں سے کچھ کو فضا میں ہی روک لیا گیا جبکہ باقی کھلے علاقوں میں جا گرے۔
نشریاتی ادارے کے مطابق حملوں کے باعث منارہ اور کریات شمونہ میں خطرے کے سائرن بجا دیے گئے۔

جنوبی لبنان کے علاقے قدمس میں اسرائیلی حملے کے بعد امدادی ٹیموں نے چار لاشیں برآمد کر لی ہیں۔
رپورٹ کے مطابق لبنانی سول ڈیفنس اور طبی عملے نے کارروائی کرتے ہوئے ملبے سے چار افراد کی لاشیں نکالیں۔
لبنان کی ایجنسی این این اے نے مزید بتایا کہ اس حملے میں تین زخمی افراد کو بھی زندہ بچا لیا گیا ہے، جنہیں طبی امداد فراہم کی جا رہی ہے۔

جنوبی لبنان کے علاقے انصاریہ میں علی الصبح ہونے والے اسرائیلی فضائی حملے میں پانچ افراد جاں بحق ہو گئے۔
لبنان کی قومی خبر رساں ایجنسی این این اے کے مطابق ہلاکتوں میں اضافے کا خدشہ ہے۔

امریکی صدر ٹرمپ نے جلد ایران کے ساتھ جنگ کے خاتمے کا عندیہ دے دیا ہے

امریکی میڈیا فاکس نیو ز کو انٹرویو دیتے ہوئے صدر ٹرمپ نے جنگ بندی سے متعلق سوال کا جواب دیتے ہوئےکہاکہ ایران کسی بھی طرح ہم سے معاہدہ کرنا چاہتا ہے، وہ اس صورتحال کو بہت قریب سمجھتے ہیں کہ جنگ جلد اپنے اختتام کو پہنچ جائےگی۔

ایرانی ذرائع ابلاغ کا کہنا ہے کہ تہران میں دھماکے کی آواز سنی گئی ہے۔

تہران کے ضلع 10 کے پاسدارانِ انقلاب کے کمانڈر محمد بالیدہ نے ایک ویڈیو پیغام میں کہا ہے کہ ’غدار اور غیر محبِ وطن عناصر‘ نے ایک ’معمولی دھماکہ‘ کیا ہے۔ تاہم انھوں نے یہ واضح نہیں کیا کہ اس دھماکے کے پیچھے کون ملوث ہے۔

ان کا کہنا ہے کہ شہر میں صورتِ حال ’قابو میں‘ ہے۔

اس ویڈیو پیغام کے بعد پاسدارانِ انقلاب سے وابستہ فارس نیوز ایجنسی نے اپنی ایک علیحدہ رپورٹ میں کہا ہے کہ یہ دھماکہ ’مائع گیس سے بنائے گئے دو دیسی ساختہ دھماکہ خیز پیکیجز‘ کی وجہ سے ہوا ہے۔

رپورٹ کے مطابق اس دھماکے میں تین افراد معمولی زخمی ہوئے ہیں جبکہ تین گھروں کی کھڑکیوں کے شیشے ٹوٹ گئے اور دو گاڑیوں کو معمولی نقصان پہنچا ہے۔

قبل ازیں امریکی وزیر خارجہ مارکو روبیو کی صدارت میں اسرائیل لبنان مذاکرات شروع ہوگئے۔واشنگٹن میں امریکہ کی ثالثی میں ہونے والے مذاکرات میں لبنان اور اسرائیل کے سفیر اپنے ملکوں کی نمائندگی کر رہے ہیں۔

یہ دونوں ملکوں کے سینیر حکام کے درمیان 40 برسوں میں ہونے والا پہلا باضابطہ رابطہ ہے ۔مذاکرات کے اہم نکات میں جنگ بندی کو یقینی بنانا، حزب اللہ کو غیر مسلح کرنا، اور ایک وسیع تر امن معاہدے کے امکانات کا جائزہ لینا شامل ہیں۔ تاہم، دونوں فریق ان نکات کو بالکل مختلف نقطۂ آغاز سے دیکھ رہے ہیں، جس کے باعث کسی مشترکہ نتیجے تک پہنچنا مشکل دکھائی دیتا ہے۔

امریکی وزیرِ خارجہ مارکو روبیو نے کہا ہے کہ اسرائیل اور لبنان کے درمیان واشنگٹن ڈی سی میں جاری مذاکرات ایک تاریخی موقع ہیں۔

انہوں نے کہا کہ اگرچہ آئندہ چند گھنٹوں میں تمام پیچیدگیاں حل ہونا ممکن نہیں، تاہم انہیں امید ہے کہ فریقین کم از کم آگے بڑھنے کا عمل شروع کریں گے اور پیش رفت کی سمت قدم اٹھائیں گے۔

دوسری جانب لبنان کا کہنا ہے کہ وسیع مذاکرات سے پہلے لبنان مکمل فائر بندی چاہتا ہے ۔ جب کہ اسرائیلی فوج کا لبنان سے انخلا بھی لبنان کے مطالبات میں شامل ہے ۔

تہران: ایرانی وزیرِ داخلہ سکندر مومنی نے کہا ہے کہ امریکہ کی جانب سے آبنائے ہرمز کی بحری ناکہ بندی سے ایران متاثر نہیں ہوگا کیونکہ ملک کی 8,000 کلومیٹر سے زائد طویل زمینی اور سمندری سرحدیں تجارت کے متبادل راستے فراہم کرتی ہیں۔

ایرانی میڈیا کے مطابق وزیرِ داخلہ نے سرحدی صوبوں کے حکام کو ہنگامی ہدایات جاری کرتے ہوئے درج ذیل نکات پر زور دیا گیا ہے، ناکہ بندی کے خطرے کو “بے اثر” کرنے کے لیے بنیادی ضرورت کی اشیاء کی درآمد کو تیز کیا جائے۔

سرحدی تجارتی مراکز پر حائل رکاوٹیں دور کی جائیں تاکہ سامان کی نقل و حمل بلاتعطل جاری رہے۔

سکندر مومنی کا کہنا تھا کہ ایران کے پاس جغرافیائی لحاظ سے اتنے وسیع مواقع موجود ہیں کہ کسی ایک بحری راستے کی بندش سے ملکی معیشت کو مفلوج نہیں کیا جا سکتا۔

انہوں نے صوبائی گورنروں کو اپنے خصوصی اختیارات استعمال کرتے ہوئے سرحد پار تجارت کو فروغ دینے کا حکم دیا ہے تاکہ عوامی زندگی پر ناکہ بندی کے اثرات کو کم سے کم کیا جا سکے۔

اسلام آباد: پاکستان میں ایران کے سفیر رضا امیری مقدم کا کہنا ہے کہ ’بحری ناکہ بندی قائم کرنے کا غیر قانونی، اشتعال انگیز اور غیر تعمیری اقدام ایک غیر ذمہ دارانہ قدم ہے۔‘

ایکس پر جاری بیان میں پاکستان میں ایرانی سفیر کا مزید کہنا تھا کہ ’اس اقدام کا مقصد یہ تاثر پیدا کرنا ہے کہ معاملات طاقت کے ذریعے مسلط کیے جا رہے ہیں تاکہ اسلحے کی تعیناتی، سخت بیانات، جانی نقصان اور امریکی ٹیکس دہندگان پر پڑنے والے مالی بوجھ کو جواز فراہم کیا جا سکے۔‘

ان کا مزید کہنا تھا کہ ’یہ غلط اندازہ خطے اور اس سے باہر کے ممالک کے لیے سنگین نتائج کا باعث بن سکتا ہے اور غلطیوں کی فہرست میں ایک اور اضافہ ہے۔‘

بیان میں اس اقدام کو معاشی دہشت گردی قرار دیتے ہوئے کہا گیا کہ ’یہ لوگوں کے معاش، عالمی امن، سلامتی اور استحکام کو خطرے میں ڈال کر چند مخصوص مفادات کی تکمیل کے لیے کیا جا رہا ہے۔‘

لندن: فرانس نے اعلان کیا ہے کہ وہ برطانیہ کے ساتھ مل کر آبنائے ہرمز کے حوالے سے ایک بین الاقوامی اجلاس کی میزبانی کرے گا۔

فرانسیسی صدارتی محل ایلیزے کے مطابق یہ کانفرنس جمعے کے روز ویڈیو لنک کے ذریعے منعقد ہوگی اور اُن ممالک کو مدعو کیا گیا ہے جو آبنائے ہرمز کی سکیورٹی کے لیے ایک ’مکمل طور پر دفاعی مشن‘ میں حصہ لینے کے لیے تیار ہیں۔

اجلاس کا مقصد ایک ایسے منصوبے پر غور کرنا ہے جس کے ذریعے ’جب سکیورٹی حالات اجازت دیں، تو آبنائے ہرمز میں بحری آمدورفت کو آزادانہ طور پر بحال کیا جا سکے۔‘

برطانوی وزیرِاعظم کے دفتر کے ترجمان نے کہا کہ ’یہ اجلاس ایک مربوط، خودمختار اور کثیرالقومی منصوبہ بندی کے لیے مدد گار ثابت ہوگا۔

فرانسیسی وزیرِ خارجہ ژاں نوئل بارو نے بتایا کہ ’اب تک درجنوں ممالک اس مشن کے فریم ورک کی تیاری کے لیے ابتدائی مشاورت میں حصہ لے چکے ہیں۔

واشنگٹن:اسرائیلی وزیر خارجہ جدعون سارنے کہا ہے کہ اسرائیل اور ریاستِ لبنان کے درمیان کوئی بڑے تنازعات موجود نہیں بلکہ دونوں ممالک کے درمیان اصل “مسئلہ” حزب اللہ ہے۔

منگل کے روز واشنگٹن میں ہونے والے اہم مذاکرات سے قبل ایک پریس کانفرنس کرتے ہوئے اسرائیلی وزیر خارجہ نے دعویٰ کیا کہ اسرائیل لبنان کے ساتھ “امن اور تعلقات کی بحالی” (Normalisation) کا خواہاں ہے۔

انہوں نے زور دے کر کہا کہ جو گروہ اسرائیل کی سلامتی کے لیے خطرہ ہے، وہی لبنان کی خودمختاری کے لیے بھی سب سے بڑا مسئلہ ہے۔

امریکی وزیر خارجہ مارکو روبیو (Marco Rubio) کی ثالثی میں ہونے والے یہ مذاکرات کئی دہائیوں بعد ایک بڑی سفارتی پیش رفت سمجھے جا رہے ہیں۔

دوسری جانب حزب اللہ نے ان مذاکرات کو “بے سود” قرار دیتے ہوئے مسترد کر دیا ہے۔ تنظیم کے ترجمان کا کہنا ہے کہ جب تک اسرائیل لبنان کی سرزمین سے مکمل انخلاء اور جنگ بندی نہیں کرتا، ان مذاکرات کی کوئی اہمیت نہیں ہے۔

اسرائیلی وزیراعظم بنجمن نیتن یاہو نے بھی واضح کیا ہے کہ وہ لبنان کے ساتھ امن معاہدے کے لیے تیار ہیں، لیکن اس کی شرط حزب اللہ کی فوجی صلاحیتوں کا مکمل خاتمہ ہوگی۔