ایران جنگ اپ ڈیٹس: 21 اپریل سے 28 اپریل

لندن/واشنگٹن: برطانوی وزیر اعظم کیئر اسٹارمر اور امریکی صدر ڈونلڈ ٹرمپ نے اتوار کے روز ایک اہم ٹیلیفونک گفتگو میں آبنائے ہرمز (Strait of Hormuz) میں بحری جہازوں کی نقل و حرکت کو فوری طور پر بحال کرنے کی ضرورت پر تبادلہ خیال کیا۔

ڈاؤننگ اسٹریٹ کے ترجمان کے مطابق، دونوں رہنماؤں نے اس بات پر اتفاق کیا کہ عالمی معیشت اور برطانیہ سمیت دنیا بھر میں عام لوگوں کی زندگیوں پر پڑنے والے منفی اثرات اور بڑھتی ہوئی مہنگائی کے پیش نظر اس تجارتی راستے کا کھلنا ناگزیر ہے۔

گفتگو کے دوران اس تشویش کا اظہار کیا گیا کہ جہاز رانی کی معطلی سے عالمی معیشت کو شدید نتائج کا سامنا ہے، جس سے اشیائے ضرورت کی قیمتوں میں اضافہ ہو رہا ہے۔

مشترکہ اقدام: وزیر اعظم اسٹارمر نے فرانسیسی صدر ایمانوئل میکرون کے ساتھ مل کر شروع کیے گئے اس مشترکہ اقدام کی تازہ ترین پیش رفت سے صدر ٹرمپ کو آگاہ کیا، جس کا مقصد سمندروں میں جہاز رانی کی آزادی کو بحال کرنا ہے۔

برطانوی وزیر اعظم نے واضح کیا کہ برطانیہ اور فرانس اس حساس خطے میں تجارتی آمد و رفت کو محفوظ بنانے کے لیے بین الاقوامی شراکت داروں کے ساتھ مل کر کام کر رہے ہیں۔

مبینہ حملہ آور نے حکام کو بتایا ہے کہ وہ ٹرمپ انتظامیہ کے عہدے داروں کو نشانہ بنانا چاہتا تھا۔

دو نامعلوم ذرائع کے حوالے سے سی بی ایس نے یہ بھی رپورٹ کیا ہے کہ اس واقعے کے دوران کم از کم پانچ سے آٹھ گولیاں چلائی گئیں۔

امریکی اٹارنی نے کہا ہے کہ ملزم کو پیر کے روز وفاقی ڈسٹرکٹ عدالت میں پیش کیا جائے گا۔

انہوں نے مزید بتایا کہ جیسے جیسے مزید معلومات سامنے آئیں گی، ملزم کے خلاف مزید الزامات بھی عائد کیے جائیں گے۔

صدر ٹرمپ کا کہنا ہے کہ اس واقعے سے خاتونِ اول میلانیا ٹرمپ شدید صدمے میں ہیں۔

صدر کا کہنا تھا کہ وہ ابتدا میں وہ تقریب چھڑ کر جانا نہیں چاہتے تھے۔ ’میں نے وہاں رکنے کی بھرپور کوشش کی۔‘ تاہم انھیں بتایا گیا کہ حفاظتی ضابطوں کے تحت وہاں سے جانا ضروری ہے، کیونکہ یہ واضح نہیں تھا کہ آیا حملہ آور اکیلا تھا یا اس کے ساتھ کوئی اور بھی شامل تھا۔

امریکی صدر ڈونلڈٹرمپ نے سوشل میڈیا پر بیان جاری کرتے ہوئے کہا کہ واشنگٹن ڈی سی میں یہ ایک غیر معمولی شام تھی۔سیکریٹ سروس اور قانون نافذ کرنے والے اداروں نے شاندار کام کیا، انہوں نے فوری اور بہادری سے کارروائی کی۔

ٹرمپ نے کہا کہ حملہ آور کو حراست میں لے لیا گیا ہے اور میں نے یہ سفارش کی ہے کہ ‘شو جاری رہنے دیا جائے’، تاہم ہم مکمل طور پر قانون نافذ کرنے والے اداروں کی ہدایات کے مطابق چلیں گے۔

وائٹ ہاؤس میں میڈیا نمائندوں کے اعزاز میں عشائیہ کے دوران سکیورٹی خدشے کے باعث مختصر وقت کیلئے ہلچل مچ گئی۔

رپورٹس کے مطابق عشایئے کے دوران فائرنگ کا واقعہ پیش آیا۔میڈیا کے مطابق حملہ آور کو ہلاک کر دیا گیا ہے۔

اس دوران سیکریٹ سروس اہلکار ٹرمپ کو عشایئے سے باہر لے گئے۔

سکیورٹی حکام کی جانب سے صورتحال کا جائزہ لیا جارہا ہے۔

ایرانی وزیر خارجہ کی آ ج دوبارہ اسلام آباد آمد متوقع ہے، ان کے وفد کا ایک حصہ مشاورت کے لیے تہران چلا گیا ہے۔
روئٹرز کے مطابق ایران کی مہر نیوز ایجنسی نے رپورٹ کیا ہے کہ ایرانی وزیر خارجہ عباس عراقچی کے عمان کا دورہ مکمل کرنے کے بعد اور روس روانگی سے قبل پاکستان کے دوبارہ دورے کا امکان ہے۔

عباس عراقچی ہفتے کی شب پاکستانی وزیراعظم شہباز شریف اور دیگر اعلیٰ حکام کے ساتھ امن مذاکرات میں کسی پیش رفت کے بغیر پاکستانی دارالحکومت سے روانہ ہو گئے تھے۔

ایران کے سرکاری نشریاتی ادارے ارنا کا کہنا ہے کہ وزیر خارجہ عباس عراقچی عمان کے دورے کے بعد روس جانے سے پہلے ایک بار پھر پاکستان کا دورہ کرنے والے ہیں۔

ایرانی وزارت خارجہ کی جانب سے اعلان کردہ منصوبے کا حوالہ دیتے ہوئے ارنا نے کہا ہے کہ ایرانی وفد کا ایک حصہ جنگ کے خاتمے سے متعلق ضروری امور پر مشاورت کے لیے تہران واپس لوٹ گیا ہے۔

ارنا کے مطابق وفد کے ارکان اتوار کی شب دوبارہ اسلام آباد میں عباس عراقچی کے ساتھ شامل ہوں گے۔ تاہم رپورٹ میں واضح طور پر یہ نہیں بتایا گیا کہ وہ کن امور پر بات چیت کریں گے یا کن شخصیات سے ملاقات متوقع ہے۔

وزیراعظم شہباز شریف نے ایران کے صدر مسعود پزشکیان سے ٹیلیفون پر تبادلہ خیال میں کہا ہے کہ پاکستان خطے میں امن اور دیرپا استحکام کے فروغ کے لیے اپنی مخلصانہ اور سنجیدہ کوششیں جاری رکھے گا۔
وزیر اعظم آفس کے میڈیا ونگ سےجاری بیان کے مطابق تقریباً پچاس منٹ تک جاری رہنے والی اس گرمجوش اور دوستانہ گفتگو کے دوران دونوں رہنماؤں نے خطے کی موجودہ صورتحال اور امن و استحکام کے فروغ کے لیے جاری کوششوں پر تفصیلی تبادلہ خیال کیا۔

اپنے ایکس پیغام میں وزیراعظم نے لکھا کہ مجھے اپنے بھائی، صدر مسعود پیزشکیان کے ساتھ ایک خوشگوار اور تعمیری ٹیلیفونک تبادلہ کرنے کا موقع ملا، جس میں خطے کی بدلتی ہوئی صورت حال پر بات چیت ہوئی۔

انہوں نے مزید لکھاکہ میں نے اس بات کا اعادہ کیا کہ دوستوں اور شراکت داروں کی حمایت کے ساتھ، پاکستان ایک دیانتدار اور مخلص سہولت کار کے طور پر خدمات انجام دینے کے لیے پرعزم ہے، جو خطے میں پائیدار امن اور دیرپا استحکام کے فروغ کے لیے مسلسل اور بھرپور کوششیں کر رہا ہے۔

اسلام آباد کی ضلعی انتظامیہ نے ٹرانسپورٹ کے حوالے سے اہم اعلان کرتے ہوئے کہا ہے کہ تمام اقسام کی پبلک اور گڈز ٹرانسپورٹ کو شہر میں داخلے کی اجازت دے دی گئی ہے۔

انتظامیہ کے مطابق شہر بھر میں فیض آباد کے علاوہ تمام بس اڈے بھی کھول دیے گئے ہیں، جبکہ فیض آباد بس ٹرمینل کو تاحکمِ ثانی بند رکھا جائے گا۔

وزیر خارجہ عباس عراقچی کی قیادت میں ایرانی وفد ہفتہ کی شام پاکستان سے واپس روانہ ہوگیا۔
اس کے فورا بعد ٹرمپ نے وٹکوف اور کشنر کا دورہ منسوخ کرنے کا اعلان کر دیا۔
تاہم اس کا یہ مطلب نہیں کہ جنگ دوبارہ شروع ہوگی۔ ٹرمپ کا کہناہے کہ انہوں نے اس بارے میں نہیں سوچا۔
امریکی صدر نے یہ بھی کہا کہ ایرانی جب چاہیں انہیں کال کر سکتے ہیں۔
ایرانی وزیر خارجہ عراقچی تہران کے مطالبات کی فہرست پاکستان کے حوالے کرکے گئے ہیں

ایران کے صدر مسعود پزشکیان نے شہریوں سے بجلی کے استعمال میں کمی لانے کی درخواست کی ہے، جب کہ یہ اپیل ایسے وقت سامنے آئی ہے جب امریکا کی جانب سے ایرانی بندرگاہوں پر بحری ناکہ بندی جاری ہے۔

صدر پزشکیان نے کہا کہ دشمن ایرانی تنصیبات کو نشانہ بنا رہا ہے اور ملک کا محاصرہ اس مقصد کے تحت کیا جا رہا ہے کہ عوام میں بے چینی پیدا ہو۔ ان کے بقول اگر گھروں میں دس بلب جلانے کے بجائے صرف دو جلائے جائیں تو اس میں کوئی قباحت نہیں۔

دریں اثنا، ایران کے سرکاری نشریاتی ادارے کی جانب سے ٹیلیگرام پر جاری ایک ویڈیو میں بجلی کی سرکاری کمپنی توانیر کے چیف ایگزیکٹو افسر نے بھی عوام پر زور دیا کہ وہ بجلی کے استعمال کو کم کریں اور اس پر کڑی نظر رکھیں۔