ایران امریکہ جنگ اپ ڈیٹس:7 مئی سے 13مئی تک

لبنان کی نیشنل نیوز ایجنسی نے بتایا ہے کہ اسرائیلی جنگی طیاروں نے رات کو جنوبی لبنان کے شہر صور کے علاقے کفر دونین میں ایک گھر پر حملہ کیا، جس کے نتیجے میں چھ افراد ہلاک اور سات زخمی ہو گئے

اسرائیلی فوج نے اعلان کیا ہے کہ لبنان کی سرحد کے قریب ہونے والی جھڑپ میں ایک فوجی ہلاک ہوگیا ہے۔

فوج کے مطابق ہلاک ہونے والے اہلکار کی شناخت الیگزینڈر گلووانیوف کے نام سے ہوئی ہے، جن کی عمر 47 سال تھی اور وہ فوج میں گاڑی چلانے کی ذمہ داریاں انجام دے رہے تھے۔ اسرائیلی فوج کا کہنا ہے کہ وہ اتوار کے روز سرحدی علاقے میں جاری لڑائی کے دوران مارے گئے۔

اسرائیل کی جانب سے لبنان پر حملے جاری ہیں، حملوں میں کئی مقامات کو نشانہ بنایا گیا۔

حملوں کے نتیجے میں دو طبی اہلکاروں سمیت مزید 3 افراد شہید ہوگئے۔

اسرائیلی حملوں میں مارچ سے اب تک 2 ہزار 846 افراد شہید ہوچکے ہیں۔

دوسری جانب حزب اللّٰہ نے اسرائیلی فوجیوں پر ڈرون حملے کرنے کا دعویٰ کیا ہے۔

ایران کے فضائی دفاعی نظام نے جنوب مغربی علاقے میں کارروائی کرتے ہوئے ایک مشتبہ دشمن ڈرون کو مار گرانے کا دعویٰ کیا ہے۔
ایرانی میڈیا کے مطابق فوجی حکام کا کہنا ہے کہ ڈرون ملکی فضائی حدود کے قریب مشکوک نقل و حرکت کر رہا تھا جس پر دفاعی نظام فوری طور پر فعال کیا گیا۔ حکام نے واقعے کے بعد علاقے میں نگرانی مزید سخت کرنے کا اعلان بھی کیا ہے۔

اسرائیلی فوج نے دعویٰ کیا ہے کہ جنوبی لبنان میں اس کے زیرِ آپریشن علاقے میں ایک “مشتبہ فضائی ہدف” کو روک کر تباہ کر دیا گیا ہے۔
فوج کی جانب سے جاری بیان میں کہا گیا کہ مشتبہ فضائی شے کی نشاندہی کے بعد اسے فوری کارروائی کرتے ہوئے نشانہ بنایا گیا۔

اسرائیلی فوج کے مطابق واقعے کے دوران کسی قسم کا الرٹ یا سائرن فعال نہیں کیا گیا۔

الجزیرہ عربی کے مطابق وسطی غزہ میں واقع المغازی پناہ گزین کیمپ پر اسرائیلی فضائی حملہ کیا گیا ہے۔

رپورٹ میں بتایا گیا ہے کہ اس حملے کے نتیجے میں ایک شخص جاں بحق جبکہ متعدد افراد زخمی ہو گئے ہیں۔

حملے کے بعد علاقے میں خوف و ہراس پھیل گیا اور امدادی کارروائیاں شروع کر دی گئی ہیں۔

اسرائیلی توپ خانے نے جنوبی لبنان میں واقع قصبوں کفرتنبیت،نباطیہ اور حروف کے اطراف کو نشانہ بنایا ہے، جس کی تصدیق الجزیرہ عربی کے نمائندے نے کی ہے۔

ایک اور واقعے میں اسرائیلی ڈرون حملے میں قصبہ نباطیہ الفوقا کو نشانہ بنایا گیا۔

مزید تفصیلات سامنے آنے کے ساتھ ہی ان حملوں کے بارے میں مزید معلومات فراہم کی جائیں گی۔

آبنائے ہرمز میں امریکہ اور ایران کے درمیان دوبارہ جھڑپوں کے بعد ڈالر کی قدر مزید کمزور ہوگئی اور تیل کی قیمتوں میں معمولی اضافہ نوٹ کیا گیا ہے ۔

خبر رساں ادارے روئٹرز کے مطابق،ڈالر انڈیکس، جو امریکی کرنسی کی کارکردگی کا بڑی عالمی کرنسیوں سے موازنہ کرتا ہے، کے مطابق صفراعشاریہ 14فیصد کمی کے ساتھ ڈالر کی قدر98اعشاریہ 195پوائنٹس پر آ گئی ہے۔

لبنان کی سرکاری خبر رساں ایجنسی کے مطابق جنوبی لبنان میں اسرائیلی فضائی حملے کے نتیجے میں لبنانی سول ڈیفنس کا ایک اہلکار جاں بحق ہوگیا۔

سول ڈیفنس کے جنرل ڈائریکٹوریٹ نے اپنے بیان میں کہا کہ “رشایا الفخار مرکز سے تعلق رکھنے والا سول ڈیفنس اہلکار اسرائیلی فضائی حملے میں شہید ہوگیا، جسے رشایا-کفرشوبا روڈ پر نشانہ بنایا گیا۔

ایران کے سرکاری ٹی وی پریس ٹی وی کے مطابق امریکا اور ایرانی بحریہ کے درمیان فائرنگ کے تبادلے کے بعد آبنائے ہرمز کے اطراف ایرانی جزائر اور ساحلی شہروں میں صورتحال اب معمول پر آ گئی ہے۔

ایران کے سرکاری ٹی وی پر ایک ایرانی رپورٹر کا کہنا ہے کہ بندر عباس میں امریکی حملوں کے بعد کسی ہلاکت یا کسی کے زخمی ہونے کی کوئی اطلاع موصول نہیں ہوئی ہے۔

سرکاری ٹی وی کا کہنا ہے کہ ’نظام زندگی معمول کے مطابق جاری ہے۔

پاکستان نےکہا ہے کہ توقع ہے امریکہ اور ایران کے درمیان معاہدہ جلدہو جائے گا، البتہ اس کا کوئی ٹائم فریم نہیں دیا۔دفتر خارجہ کے ترجمان طاہر اندرابی کے مطابق اسلام آباد ایران اور امریکہ کے درمیان کسی بھی مقام پر طے پانے والے تصفیے کا خیر مقدم کرے گا۔

انہوں نے اسلام آباد میں صحافیوں سے گفتگو کرتے ہوئے کہاکہ اگر یہ معاہدہ پاکستان میں طے پایا تو ہمارے لیے یہ باعثِ فخر ہو گا۔تاہم طاہر اندرابی نے ممکنہ معاہدے کی تفصیلات کی تصدیق کرنے سے انکار کر دیا۔

پاکستانی حکومت کے ذرائع نے قبل ازیں ترک خبر ایجنسی کو بتایا تھا کہ وہ امریکہ اور ایران میں امن مذاکرات کے دوسرے دور کی میزبانی کی توقع رکھتے ہیں، جو اگلے ہفتے ہو سکتا ہے تاکہ دونوں ممالک کے درمیان جنگ ختم کی جا سکے۔ذرائع نے مزید کہا کہ اسلام آباد توقع رکھتا ہے کہ امریکہ اور ایران امریکی صدر ڈونلڈ ٹرمپ کے دورہ چین سے پہلے ایک ابتدائی معاہدے پر پہنچ جائیں گے، جو اگلے ہفتے کے آخر میں ہوگا۔

پاسدارانِ انقلاب کے سابق سربراہ اور ایرانی سپریم لیڈر کے مشیر محسن رضائی نے کہا ہے کہ ایران جوہری معاملے پر کسی سے مذاکرات نہیں کرے گااور آبنائے ہرمز پر کنٹرول ایران ہی کے پاس رہنا چاہیے۔

ایران کی سرکاری خبر رساں ایجنسی اسنا کے مطابق محسن رضائی نے خبردار کیا کہ اگر آبنائے ہرمز کا کنٹرول اور انتظام ایران کے ہاتھ سے نکل گیا تو دشمن ایک بار پھر اسے ایران کے خلاف ہتھیار کے طور پر استعمال کرے گا۔

انھوں نے مزید کہا کہ آبنائے ہرمزکے لیے ایرانی ماڈل اس بات پر زور دیتا ہے کہ خطے میں سیکیورٹی کا بندوبست متعلقہ ملکوں کو ہی کرناچاہیے، غیر ملکی افواج، چاہے وہ امریکی ہوں یا یورپی، کو خطے سے نکل جانا چاہیے۔دریں اثنا،برطانوی بحریہ کے سابق سربراہ کا کہنا ہے کہ ایران اس وقت تک آبنائے ہرمز پر اپنا کنٹرول آسانی سے نہیں چھوڑے گا جب تک دیگر اہم معاملات پر اتفاق نہ ہو جائے۔ایڈمرل لارڈ ایلن ویسٹ کے مطابق اس اہم گزرگاہ کو دوبارہ کھولنے کا انحصار تہران پر ہوگا اور اس بات پر کہ مذاکرات میں پیش کی جانے والی شرائط سے ایران کس حد تک مطمئن ہے۔

لبنان کے مسیحی اکثریتی قصبے ڈیبل سے ایک نئی تصویر سامنے آئی ہے جس میں ایک اسرائیلی فوجی حضرت مریمؑ کے مجسمے کی بے حرمتی کرتا دکھائی دے رہا ہے۔

یہ وہی مقام ہے جہاں اس سے قبل ایک اسرائیلی فوجی نے ہتھوڑے کی مدد سے حضرت عیسیٰؑ کے مجسمے کو توڑ دیا تھا، جس پر دنیا بھر میں مسیحی برادری کی جانب سے شدید غم و غصے کا اظہار کیا گیا تھا۔

سوشل میڈیا پر وائرل ہونے والی نئی تصویر کے بعد ایک بار پھر اسرائیلی فوج کے رویے پر تنقید کا سلسلہ شروع ہو گیا ہے، جبکہ مختلف حلقوں نے مذہبی مقدسات کی بے حرمتی کی مذمت کی ہے۔

ایران نے اس ہفتے کے آغاز میں آبنائے ہرمز میں جنوبی کوریا کے ایک جہاز پر ہونے والے دھماکے میں کسی بھی قسم کے ملوث ہونے کی تردید کر دی ہے۔

سیول میں ایرانی سفارت خانے نے اپنے بیان میں کہا،
“ایران اسلامی جمہوریہ کی مسلح افواج کے جنوبی کوریائی جہاز کو نقصان پہنچنے کے واقعے میں ملوث ہونے سے متعلق تمام الزامات کو سختی سے مسترد اور دوٹوک انداز میں رد کرتا ہے۔”

جنوبی کوریا کی وزارت خارجہ نے منگل کو کہا تھا کہ جنوبی کوریا کے زیر انتظام جہاز میں دھماکے اور آگ لگنے کی اصل وجہ کا تعین اُس وقت ہی کیا جا سکے گا جب جہاز کو بندرگاہ تک پہنچایا جائے گا۔

اس سے قبل امریکی صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر دعویٰ کیا تھا کہ ایران نے آبنائے ہرمز میں جنوبی کوریا کے ایک مال بردار جہاز پر فائرنگ کی۔

ایرانی سفارت خانے نے مزید کہا کہ امریکا اور اسرائیل کی جارحانہ کارروائیوں کے باعث ایران اب آبنائے ہرمز کو اپنی “دفاعی جغرافیہ” کا اہم حصہ سمجھتا ہے۔

بیان میں کہا گیا کہ “دشمن قوتوں اور ان کے اتحادیوں” کی جانب سے بڑھتی ہوئی کشیدگی کے باعث اس اہم آبی گزرگاہ میں سیکیورٹی پروٹوکول تبدیل ہو چکے ہیں۔

ایران اور امریکا کے درمیان ممکنہ امن معاہدے کی خبروں کے باوجود عالمی منڈی میں خام تیل کی قیمتوں میں اضافہ دیکھا گیا، جبکہ ماہرین نے آبنائے ہرمز کی صورتحال کو اب بھی بڑا خطرہ قرار دیا ہے۔

امریکی خام تیل ویسٹ ٹیکساس انٹرمیڈیٹ (WTI) کے فیوچر معاہدے جمعرات کی ابتدائی ٹریڈنگ میں تقریباً ایک ڈالر اضافے کے بعد 95.88 ڈالر فی بیرل تک پہنچ گئے۔

رپورٹس کے مطابق بدھ کے روز قیمت ایک موقع پر 96.33 ڈالر فی بیرل کی سطح تک بھی گئی۔

یہ اضافہ ان اطلاعات کے بعد سامنے آیا جن میں کہا گیا کہ امریکا اور ایران ابتدائی امن معاہدے کے قریب پہنچ رہے ہیں۔

رسک انٹیلی جنس کمپنی ویریسک میپل کرافٹ کے توانائی و وسائل شعبے کے سربراہ کاہو یو نے رائٹرز سے گفتگو میں خبردار کیا کہ جب تک آبنائے ہرمز میں حملوں کا خطرہ واضح طور پر کم نہیں ہوتا، تیل کی قیمتیں اور شپنگ سرگرمیاں معمول پر واپس نہیں آئیں گی۔

انہوں نے کہا کہ سفارتی رابطے جاری رہنے کے باوجود توانائی کی عالمی منڈی فوری طور پر بحران سے پہلے والی صورتحال میں واپس جاتی دکھائی نہیں دیتی۔

کاہو یو کے مطابق ایران اور چین کے درمیان سفارتی کوششوں کا مقصد کشیدگی میں کمی لانا ہے، تاہم اصل توجہ اس بات پر رہے گی کہ آبنائے ہرمز مکمل طور پر کھلتی ہے یا نہیں۔

انہوں نے مزید کہا کہ آنے والے مہینوں میں تیل بردار جہازوں کی حقیقی آمدورفت اور توانائی کی ترسیل اس بات کا اصل پیمانہ ہوگی کہ آیا بیجنگ تہران پر اپنا اثر و رسوخ استعمال کرتے ہوئے خطے میں دیرپا استحکام لا سکتا ہے یا نہیں۔

امریکی صدر ڈونلڈ ٹرمپ نے پیش گوئی کی ہے کہ ایران کے ساتھ جاری جنگ جلد ختم ہو جائے گی، جبکہ آبنائے ہرمز کی ناکہ بندی اور تہران کے جوہری پروگرام سے متعلق تنازع کے حل کیلئے معاہدے کی کوششیں جاری ہیں۔
خبر رساں ادارے رائٹرز کے مطابق امریکی صدر ڈونلڈ ٹرمپ نے اپنی جماعت کے حامیوں سے ٹیلیفونک گفتگو میں کہا کہ امریکا ایران کو جوہری ہتھیار حاصل کرنے کی اجازت نہیں دے سکتا۔
ٹرمپ کا کہنا تھا کہ “جو کچھ ہو رہا ہے، ہم ایک بہت اہم وجہ کی خاطر کر رہے ہیں، ہم انہیں جوہری ہتھیار رکھنے کی اجازت نہیں دے سکتے۔”
انہوں نے مزید کہا کہ زیادہ تر لوگ سمجھتے ہیں کہ امریکا جو اقدامات کر رہا ہے وہ درست ہیں، اور ان کے بقول یہ جنگ “جلد ختم ہو جائے گی۔”