ٹرمپ نے ایران سے معاہدہ عرب ممالک کے اسرائیل کو تسلیم کرنے سے جوڑ دیا

وزیراعظم شہباز شریف کے بعد پاکستانی آرمی چیف فیلڈ مارشل عاصم منیر بھی بیجنگ پہنچ گئے۔ اس دورے کا مقصد ایران اور امریکہ کے درمیان معاہدے کی راہ ہموار کرنا ہے۔ چین ممکنہ طور پر اس معاہدے کا ضامن بن رہا ہے۔
ٹی وی رپورٹس کے مطابق پاکستانی آرمی چیف عاصم وزیراعظم شہباز شریف کے ہمراہ بیجنگ میں موجود ہیں، جہاں خطے کی صورتحال اور مشرق وسطیٰ میں جاری کشیدگی پر اہم سفارتی رابطے متوقع ہیں۔
فیلڈ مارشل عاصم منیر گزشتہ ہفتے پاکستانی وزیر داخلہ محسن نقوی کے ہمراہ تہران گئے تھے، جہاں ایران اور امریکا اسرائیل تنازع کے خاتمے کے لیے جاری ثالثی کوششوں میں حصہ لیا گیا۔
دوسری جانب چین نے کہا ہے کہ وہ پاکستان کے ساتھ مل کر مشرق وسطیٰ میں امن اور استحکام کی جلد بحالی کے لیے مثبت کردار ادا کرے گا۔

لبنان کی قومی خبر ایجنسی کے مطابق جنوبی لبنان میں اسرائیل کے تین حملوں میں تین افراد جاں بحق ہوگئے ہیں۔

رپورٹ کے مطابق نبطیہ کے علاقے میں کفر رمان–جرمق شاہراہ اور جرمق–خردالی روڈ پر گاڑیوں کو نشانہ بنایا گیا، جس کے نتیجے میں تین افراد جان کی بازی ہار گئے۔

اسرائیلی ڈرونز مسلسل دوسرے روز لبنانی دارالحکومت بیروت کی فضاؤں میں پرواز کر رہے ہیں۔

الجزیرہ کی رپورٹ کے مطابق وسطی بیروت اور شہر کے جنوبی مضافات کے اوپر اسرائیلی ڈرونز کی مسلسل گونج سنائی دے رہی ہے، جو کم اونچائی پر پرواز کر رہے ہیں۔

اسرائیلی فوج نے کہا ہے کہ جنوبی لبنان میں “جھڑپ ” کے دوران اس کا ایک فوجی ہلاک ہوگیا۔
فوج کے مطابق اسی واقعے میں ایک اور فوجی شدید زخمی ہوا، جسے فوری طور پر طبی امداد کے لیے اسپتال منتقل کردیا گیا ہے۔

ایرانی خبر رساں ادارے “تسنیم” نے دعویٰ کیا ہے کہ ایران اور امریکہ کے درمیان ممکنہ معاہدے کی شرائط پر اختلافات بدستور موجود ہیں، یورینیم افزودگی کو 10 برس تک روکنے سے متعلق کوئی فیصلہ نہیں کیا گیا۔
رپورٹ کے مطابق ایران نے پاکستان کو بھی آگاہ کر دیا ہے کہ اگر امریکہ کی جانب سے رکاوٹیں برقرار رہیں تو مفاہمتی یادداشت پر دستخط نہیں کیے جائیں گے۔
یاد رہے کہ تسنیم نیوز ایجنسی کو ایران کی پاسدارانِ انقلاب کے قریب سمجھی جانے والی خبر رساں ایجنسی قرار دیا جاتا ہے۔

پاک فوج کے سربراہ فیلڈ مارشل عاصم منیر نے ایران کے اعلیٰ مذاکرات کار اور پارلیمنٹ کے اسپیکر محمد باقر قالیباف سے ملاقات کی ہے۔ ایرانی سرکاری میڈیا کے مطابق یہ ملاقات خطے میں بڑھتی کشیدگی کے تناظر میں جاری سفارتی کوششوں کا حصہ تھی۔

فیلڈ مارشل عاصم منیر نے اپنے دورہ ایران کے دوران ایرانی صدر مسعود پزشکیان سے بھی ملاقات کی، جس میں ایرانی وزیر خارجہ عباس عراقچی بھی موجود تھے۔

واضح رہے کہ پاکستانی وفد فیلڈمارشل عاصم منیر کی سربراہی میں تہران میں موجود ہے۔

الجزیرہ کے نمائندے کے مطابق اسرائیلی فورسز جنوبی لبنان کے قصبے طیبہ میں مسماری کی کارروائیاں کر رہی ہیں، جبکہ اسرائیلی فضائی حملے میں قصبہ شاہبیہ کو نشانہ بنایا گیا ہے۔
رپورٹ کے مطابق حملوں اور زمینی کارروائیوں کی مزید تفصیلات جلد سامنے آنے کی توقع ہے۔

جنوبی لبنان کے علاقے الحفور پر اسرائیلی فضائی حملے میں تین افراد زخمی ہو گئے۔ لبنان کی قومی خبر رساں ایجنسی کے مطابق حملے کے بعد علاقے میں امدادی کارروائیاں شروع کر دی گئیں۔

رپورٹ کے مطابق اسرائیلی ڈرون حملوں نے جنوبی قصبے دیر قانون النہر کو بھی نشانہ بنایا۔

پاکستان کے وفاقی وزیر داخلہ محسن نقوی ایرانی حکام سے ملاقاتوں کے لیے تہران روانہ ہو گئے ہیں، جہاں وہ خطے کی صورتحال اور ایران امریکا مذاکرات کی بحالی پر بات چیت کریں گے۔ یہ ایک ہفتے کے دوران ان کا تہران کا دوسرا دورہ ہے جبکہ پاکستان دونوں فریقین کے درمیان ثالثی کی کوششیں جاری رکھے ہوئے ہے۔

فلسطینی خبر رساں ادارے وفا کے مطابق درجنوں اسرائیلی آبادکاروں نے اسرائیلی فورسز کی سکیورٹی میں مسجد اقصیٰ کے احاطے میں داخل ہو کر تلمودی رسومات ادا کیں۔

رپورٹ کے مطابق اسرائیلی فورسز نے آج صبح ایک بچے کو بھی مسجد سے نکال دیا۔ القدس گورنریٹ کا کہنا ہے کہ راغب ماجد الجعبہ پر مسجد اقصیٰ میں داخلے پر چھ ماہ کی پابندی عائد کر دی گئی ہے۔

گورنریٹ کے مطابق راغب ماجد الجعبہ مسجد اقصیٰ کے احاطے میں قائم ریاض الاقصیٰ سیکنڈری اسکول کا طالب علم ہے، اور پابندی کے باعث وہ اپنے امتحاناتِ تیاری (Mock Exams) میں بھی شرکت نہیں کر سکے گا۔

امریکی نائب صدر جے ڈی وینس نے ایران سے متعلق بیان میں کہا ہے کہ امریکہ کے سامنے ’ایک سادہ تجویز‘ ہے اور اس معاملے میں ’دو راستے‘ موجود ہیں۔
جے ڈی وینس نے کہا کہ ’ایران جوہری ہتھیار حاصل نہیں کر سکتا۔‘ انہوں نے ایران کی عسکری صلاحیتوں کو نقصان پہنچانے کے امریکی اقدامات کا حوالہ دیتے ہوئے خبردار کیا کہ ایران کے جوہری ہتھیار حاصل کرنے کی صورت میں دیگر ممالک بھی اپنے ہتھیار بنانے کی دوڑ میں شامل ہو جائیں گے۔
ان کے مطابق اس سے ’دنیا بھر میں جوہری ہتھیاروں کی دوڑ شروع ہو جائے گی‘ جو ’ہم سب کے لیے حالات کو مزید غیر محفوظ بنا دے گی۔‘
انہوں نے کہا کہ ’ایران دراصل وہ پہلا ڈومینو ثابت ہوگا جو پوری دنیا میں جوہری ہتھیاروں کی دوڑ کو جنم دے گا۔‘
جے ڈی وینس کا کہنا تھا کہ امریکہ ’معاہدہ کرنے کے لیے تیار ہے، بشرطیکہ ایرانی اس بنیادی نکتے پر ہمارے ساتھ متفق ہوں کہ وہ کبھی جوہری ہتھیار حاصل نہیں کریں گے۔‘
انہوں نے مزید کہا کہ امریکہ ’نیک نیتی‘ کے ساتھ مذاکرات کر رہا ہے اور ان کے خیال میں معاہدہ ممکن ہے۔
امریکی نائب صدر نے کہا کہ دوسرا راستہ فوجی کارروائی دوبارہ شروع کرنا ہے تاکہ ’امریکی مقاصد کے حصول کی کوشش جاری رکھی جا سکے۔‘
تاہم انہوں نے کہا کہ ’صدر یہی نہیں چاہتے اور میرا خیال ہے کہ ایرانی بھی ایسا نہیں چاہتے۔‘
جے ڈی وینس نے کہا کہ واشنگٹن اور تہران کے تعلقات کو نئے سرے سے استوار کرنے کا موقع موجود ہے، ’لیکن اس کے لیے دونوں جانب سے آمادگی ضروری ہے۔‘
انہوں نے مزید کہا، ’ہم ایسا کوئی معاہدہ نہیں کریں گے جس کے تحت ایرانیوں کو جوہری ہتھیار رکھنے کی اجازت ملے، اس لیے جیسا کہ صدر نے ابھی مجھ سے کہا، ہم مکمل طور پر تیار ہیں۔ ہم اس راستے پر نہیں جانا چاہتے لیکن اگر ضرورت پڑی تو صدر اس کے لیے تیار اور مکمل صلاحیت رکھتے ہیں۔‘

امریکی ایوانِ نمائندگان میں ایران جنگ سے متعلق سماعت کے دوران اُس وقت سخت جملوں کا تبادلہ ہوا جب جنگی کارروائیوں کی نگرانی کرنے والے امریکی جنرل کو جنگ میں پیش رفت سے متعلق سوالات کا سامنا کرنا پڑا۔
امریکی رکن کانگریس سیتھ مولٹن نے عہدیدار کو مخاطب کرتے ہوئے پوچھا کہ ’اس جنگ کو حقیقت میں جیتنے کا منصوبہ کیا ہے؟‘
عراق جنگ میں امریکی میرین کور کے ساتھ خدمات انجام دینے والے مولٹن نے کہا کہ ’ایسا محسوس ہوتا ہے کہ ہم جنگ ہار رہے ہیں۔‘
انہوں نے مزید کہا کہ ’ہمارے پاس کوئی جوہری معاہدہ نہیں، نہ ہی آبنائے ہرمز کھلی ہے۔‘
سیتھ مولٹن کا کہنا تھا کہ جنگ ’اچھی نہیں جا رہی‘ اور وہ جاننا چاہتے ہیں کہ ’اس غلطی کی قیمت میں ہمیں مزید کتنے امریکیوں کی جان دینی پڑے گی۔‘
اس دوران امریکی جںرل کوپر، جو اپنے پرسکون انداز کے لیے جانے جاتے ہیں، سوالات پر واضح طور پر برہم دکھائی دیے اور جواب میں کہا، ’میرے خیال میں آپ کا یہ بیان مکمل طور پر نامناسب ہے۔‘
اس سے قبل کوپر نے مؤقف اختیار کیا تھا کہ امریکہ جنگ میں اپنے تمام فوجی اہداف حاصل کر چکا ہے اور اگرچہ جنگ بندی نافذ ہے، تاہم ’ہم ہر قسم کی صورتحال سے نمٹنے کے لیے تیار ہیں۔‘
انہوں نے 28 فروری کو ایک اسکول پر امریکی حملے کی ذمہ داری قبول کرنے سے بھی گریز کیا، جس میں تقریباً ۱۷۰ ایرانی شہری مارے گئے تھے جن میں اکثریت بچوں کی تھی۔

ایران کے وزیر خارجہ عباس عراقچی نے امریکی صدر ڈونلڈ ٹرمپ کی جانب سے ایران پر دوبارہ فوجی کارروائی کے امکان پر ردعمل دیتے ہوئے کہا ہے کہ ’یقین رکھیں کہ میدان جنگ میں واپسی کی صورت میں آپ کو بہت سے سرپرائز ملیں گے۔‘

واضح رہے کہ امریکی صدر ڈونلڈ ٹرمپ نے اپنے حالیہ بیان میں کہا تھا کہ ایران کے پاس کسی ممکنہ معاہدے تک پہنچنے کے لیے ’محدود وقت‘ باقی ہے کیونکہ امریکہ اسے ’جوہری ہتھیار حاصل نہیں کرنے دے سکتا۔ معاہدہ نہ ہونے کی صورت میں امریکہ دوبارہ ایران پر حملہ کر سکتا ہے۔‘

عباس عراقچی نے ٹرمپ کے بیان کے بعد سماجی رابطے کی ویب سائٹ ایکس پر جاری اپنے ردعمل میں کہا کہ ’ایران کے خلاف جنگ شروع ہونے کے چند ماہ بعد امریکی کانگریس نے اربوں ڈالر مالیت کے درجنوں طیاروں کی تباہی کا اعتراف کیا ہے۔‘

انہوں نے مزید کہا کہ ’اب یہ باضابطہ طور پر تصدیق ہو گئی ہے کہ ہماری طاقتور مسلح افواج دنیا کی پہلی طاقت تھی جس نے جدید اور مشہور ایف ۳۵ لڑاکا طیارے کو مار گرایا۔‘

اپنی پوسٹ کے اختتام پر عباس عراقچی نے دعویٰ کیا کہ ’ہم نے جو سیکھا اور جو علم ہم نے حاصل کیا ہے اس کے ساتھ، یقین رکھیں کہ میدان جنگ میں واپسی اور بھی بہت سی حیرتیں ساتھ لائے گی۔‘

دوسری جانب منگل کو واشنگٹن میں صحافیوں سے گفتگو کرتے ہوئے صدر ٹرمپ نے خبردار کیا کہ اگر معاہدہ نہ ہوا تو امریکہ ایران پر دوبارہ حملہ کر سکتا ہے۔

صدر ٹرمپ نے مزید کہا کہ ’ایران کے پاس دو، تین دن اور ہیں، شاید جمعے، سنیچر اور اتوار یا اگلے ہفتے کی ابتدا تک کا وقت ہے۔‘

یاد رہے کہ صدر ٹرمپ نے گزشتہ روز کہا تھا کہ انہوں نے منگل کو ایران پر حملے کا فیصلہ کر لیا تھا، تاہم سعودی عرب، متحدہ عرب امارات اور قطر کی قیادت کی درخواست پر اس فیصلے کو مؤخر کر دیا گیا۔