ایران جنگ اپ ڈیٹس 29 اپریل سے 6 مئی

امریکی میڈیانے کہا ہے کہ امریکا اور ایران جنگ بندی پر معاہدے کے قریب پہنچ گئے ہیں۔رپورٹ کے مطابق ایک صفحے پر مشتمل مجوزہ معاہدہ زیر غور ہے، جو دونوں ممالک کے درمیان جاری تنازع کے خاتمے کی بنیاد بن سکتا ہے۔ اس معاہدے میں کئی اہم نکات شامل کیے گئے ہیں جو خطے میں امن کے قیام کے لیے اہم سمجھے جا رہے ہیں۔

امریکی حکام اور وائٹ ہاؤس کے قریبی ذرائع نے دعویٰ کیا ہے کہ امریکا اور ایران کے درمیان جنگ کے باقاعدہ خاتمے اور ایٹمی مذاکرات کے نئے فریم ورک پر اتفاق کے لیے مفاہمتی یادداشت (MOU) تیار کر لی گئی ہے۔

ذرائع کے مطابق مجوزہ معاہدے کے تحت آبنائے ہرمز سے گزرنے پر عائد پابندیاں ختم کرنے کی تجویز دی گئی ہے، جس سے عالمی تجارتی سرگرمیوں اور تیل کی ترسیل میں بہتری آنے کی توقع ہے۔ رپورٹ میں کہا گیا ہے کہ امریکا ایران کے منجمد اثاثے جاری کرنے پر بھی آمادگی ظاہر کر سکتا ہے، جو ایران کی معیشت کے لیے ایک بڑا ریلیف ہوگا۔

معاہدے کی دیگر اہم شقوں میں ایران کی جانب سے یورینیم افزودگی روکنے اور امریکا کی جانب سے اقتصادی پابندیاں ختم کرنے کی تجاویز شامل ہیں۔ذرائع کے مطابق فریقین اس وقت معاہدے کے اتنے قریب ہیں جتنا جنگ کے آغاز سے اب تک کبھی نہیں رہے تھے۔

امریکی خبر رساں ادارے ایگزیوس کے مطابق امریکا کو اگلے 48 گھنٹوں میں ایران کی جانب سے چند اہم نکات پر حتمی جواب کا انتظار ہے۔ترجمان ایرانی وزارت خارجہ اسماعیل بقائی نے امریکا کی جانب سے تجاویز ملنے کی تصدیق کرتے ہوئے کہا کہ امریکاکی14نکاتی امن تجاویزکاجائزہ لے رہے ہیں ۔

وزیر اعظم شہباز شریف نے آبنائے ہرمز میں ’’پراجیکٹ فریڈم‘‘ کو معطل کرنے پر امریکی صدرکا شکریہ ادا کیا ہے۔سوشل میڈیا پر جاری بیان میں شہباز شریف نے لکھاکہ پاکستان، سعودی عرب اور دیگر برادر ممالک کی درخواست پر صدر ٹرمپ کا مثبت رد عمل خطے میں امن، استحکام اور مفاہمت کو آگے بڑھانے میں اہم کردار ادا کرے گا۔

شہباز شریف کے مطابق پاکستان مکالمے اور سفارت کاری کے ذریعے تنازعات کے پر امن حل کی حمایت کرتا ہے۔ایکس پر اپنے بیان میں وزیر اعظم نے ایک ایسے دیر پا معاہدے کے لیے امید ظاہر کی جو خطے میں پائیدار امن اور استحکام یقینی بنائے گا۔

غزہ میں جاری کارروائیوں کے دوران اسرائیل نے شمالی غزہ سٹی پر ایک اور حملہ کیا جس کے نتیجے میں آگ لگ گئی۔
رپورٹس کے مطابق نام نہاد جنگ بندی کے باوجود حملے جاری ہیں، جبکہ مقامی فلسطینی آگ بجھانے کے لیے موقع پر پہنچ گئے اور شعلوں پر قابو پانے کی کوشش کرتے رہے۔

غزہ میں جاری کارروائیوں کے دوران اسرائیل نے شمالی غزہ سٹی پر ایک اور حملہ کیا جس کے نتیجے میں آگ لگ گئی۔
رپورٹس کے مطابق نام نہاد جنگ بندی کے باوجود حملے جاری ہیں، جبکہ مقامی فلسطینی آگ بجھانے کے لیے موقع پر پہنچ گئے اور شعلوں پر قابو پانے کی کوشش کرتے رہے۔

اسرائیلی فوج نے کہا ہے کہ گزشتہ چند گھنٹوں کے دوران جنوبی لبنان میں اس کی افواج پر دو مرتبہ حزب اللہ کی جانب سے مارٹر گولہ باری کی گئی۔

فوجی ترجمان کے مطابق ان دونوں حملوں میں اسرائیلی افواج کو کسی قسم کا جانی نقصان نہیں پہنچا۔

امریکی سینٹکام اور حکام نے رپورٹ کیا کہ امریکی نیوی نے آبنائے ہرمز کے قریب تجارتی جہازوں کی طرف بڑھنے والی ایرانی پاسداران انقلاب کی چھوٹی تیز رفتار کشتیوں کو نشانہ بنا کر تباہ کیا۔
ایرانی میڈیا اور رپورٹس کے مطابق امریکی حملوں میں 5ایرانی شہریوں اور عملے کے ارکان شہید ہوئے ہیں۔

ایرانی صوبے زنجان میں ایک کلیئرنس آپریشن کے دوران پاسدارانِ انقلاب کے 14 اہلکار جاں بحق ہوگئے ہیں۔

سرکاری خبر رساں ادارے ارنا کے مطابق، اسرائیل اور امریکہ کے ساتھ جنگ کے دوران نہ پھٹنے والے بارود کی باقیات دھماکے سے پھٹ گئیں۔

پاسدارانِ انقلاب کی ٹیمیں کلسٹر بموں اور اسی نوعیت کے دیگر اسلحے کو ناکارہ بنا رہی تھیں، جو1200یکٹر سے زائد رقبے، بشمول زرعی زمین، کو آلودہ کر چکا تھا۔ ان میں سے کئی بارودی آلات انتہائی حساس تھے اور تین میٹر تک زمین کے اندر دھنس چکے تھے، جس کی وجہ سے ان کی نشاندہی نہایت خطرناک عمل تھا۔

پاکستان کے وزیر خارجہ محمد اسحاق ڈار نے کویتی ہم منصب شیخ جراح جابر الاحمد الصباح سے رابطہ کر کے خطے کی صورتحال اور اس کے معاشی اثرات پر بات چیت کی ہے۔دفتر خارجہ کے مطابق دونوں وزرائے خارجہ نے خطے میں جاری پیش رفت اور اس کے اقتصادی مضمرات پر تفصیلی تبادلہ خیال کیا۔

کویتی وزیر خارجہ نے امت مسلمہ اور عالمی برادری کے لیے پائیدار امن کے قیام میں پاکستان کی کوششوں کو سراہتے ہوئے اسے اہم قرار دیا۔
وزیر خارجہ اسحاق ڈار نے کہا کہ پاکستان سفارتی سطح پر فعال کردار ادا کر رہا ہے اور امریکا اور ایران کے درمیان تعطل کا شکار مذاکرات میں بھی ثالثی کی کوششیں جاری رکھے ہوئے ہے۔

انہوں نے اس عزم کا اعادہ کیا کہ پاکستان خطے میں کشیدگی کم کرنے اور سفارتی حل کے فروغ کے لیے اپنا کردار جاری رکھے گا۔

لبنان کی سرکاری خبر رساں ایجنسی این این اے کے مطابق علی الصبح جنوبی لبنان کے مختلف علاقوں پر مزید حملے کیے گئے ہیں۔
رپورٹ کے مطابق اسرائیلی فورسز نے رمیا اور قوزہ کے قصبوں پر بھاری مشین گنوں سے فائرنگ کی، جبکہ اس سے قبل فرون کے علاقے کو توپ خانے سے نشانہ بنایا گیا۔
ادھر اسرائیلی فوج جنگ بندی کے باوجود جنوبی لبنان میں رہائشیوں کو علاقے خالی کرنے کی وارننگ دے رہی ہے اور جبری نقل مکانی کا سلسلہ جاری رکھے ہوئے ہے۔

اسرائیلی فوج نے جنوبی لبنان کے کئی شہروں اور دیہات کے رہائشیوں کو علاقہ خالی کرنے کا حکم جاری کیا ہے، حالانکہ جنگ بندی کے باوجود علاقے میں جبری انخلا کا سلسلہ جاری ہے۔
اسرائیلی فوج نے ایکس پر جاری بیان میں کہا ہے کہ تازہ انخلا کے احکامات میں قعقعیت الجسر، عدشیت الشقیف، جبشیت، عبا، کفرا جوز، حروف، الدوائر، دیر الزہرانی اور حبّوش شامل ہیں۔
اس سے قبل رپورٹس میں بتایا گیا تھا کہ جمعہ کے روز حبّوش میں اسرائیلی حملے کے دوران کم از کم آٹھ افراد جاں بحق ہوئے۔

لبنان کے وزیراعظم نواف سلام نے عزم ظاہر کیا ہے کہ وہ مقبوضہ لبنانی علاقے کا ہر انچ واپس لینے کے لیے اپنی کوششیں جاری رکھیں گے۔
یومِ مزدور کے موقع پر ایکس پر اپنے بیان میں انہوں نے کہا کہ حکومت عوام کی زندگی کے حالات بہتر بنانے کے لیے سخت محنت جاری رکھے گی، معیشت کو بحال کرے گی، نئی ملازمتوں کے مواقع پیدا کرے گی، استحکام لائے گی اور ملک کو حقیقی بحالی کی راہ پر گامزن کرے گی۔

ایران کی نیم سرکاری خبر رساں ایجنسی تسنیم نے رپورٹ کیا ہے کہ گزشتہ رات ایرانی فضائی دفاعی نظام نے دارالحکومت تہران کے بعض علاقوں میں چھوٹے اور جاسوس ڈرونز کا کو نشانہ بنایا ہے۔

یہ اطلاعات ایک ایسے وقت میں سامنے آئی ہیں جب شہر کے مغربی، وسطی اور جنوب مشرقی حصوں میں فضائی دفاعی فائر کی آوازیں سنی گئی تھیں۔

متحدہ عرب امارات نے’خطے میں موجودہ پیش رفت کی روشنی میں‘ اپنے شہریوں کے ایران، لبنان اور عراق کے سفر پر پابندی عائد کر دی ہے۔

سوشل میڈیا پلیٹ فارم ایکس پر جاری ایک بیان میں متحدہ عرب امارات کی وزارتِ خارجہ نے اپنے شہریوں کو ہدایت دی ہے کہ وہ ان ممالک سے فوراً واپس آ جائیں۔

امریکی صدر ڈونلڈ ٹرمپ نے آبنائے ہرمزکواپنے نام سے منسوب کرنے کی تجویزدہرائی ہے۔ انہوں نے ایک سوشل میڈیا پوسٹ شیئر کی ہے جس میں تجویز دی گئی ہے کہ آبنائے ہرمز کا نام تبدیل کر کے ’’سٹریٹ آف ٹرمپ‘‘رکھ دیا جائے۔

ٹرمپ کی ٹروتھ سوشل پلیٹ فارم پر اس پوسٹ میں ایک نقشہ بھی شامل تھا جس پر یہ متبادل نام درج ہے۔

اس سے قبل صدر ٹرمپ اپنی تقریر کے دوران آبنائے ٹرمپ کی اصطلاح استعمال کر چکے ہیں۔ انہوں نے کہا تھا میڈیا ابتدا میں اسے شاید غیر ارادی غلطی سمجھے لیکن سب جانتے ہیں کہ وہ کبھی کبھار ہی کوئی غلطی کرتے ہیں۔

مبصرین کا کہنا ہے کہ یہ پوسٹ دوبارہ شیئر کرنا صرف علامتی ہے اور اس کا مقصد پالیسی کا اعلان کرنے کی بجائے ردعمل پیدا کرنا تھا۔

پہلی بار ایرانی بحری سربراہ نے براہ راست امریکہ کو للکاراہے۔ ایڈمرل شہرام ایرانی نے خبردار کیا ہے کہ جلد ایسا اسلحہ استعمال کریں گے جس سے دشمن کانپتا ہے۔اپنے ایک بیان میں ایرانی نیول چیف نے کہا کہ یہ اسلحہ دشمن کے بہت قریب ہے، امید ہے انہیں دل کا دورہ نہ پڑے۔

ایڈمرل شہرام کا کہنا ہے کہ دشمن بحیرۂ عرب سے ہرمز کی جانب تھوڑا بھی بڑھا تو تیز تر ردِعمل دیں گے، امریکی فوری فتح کا اندازہ اب ملٹری اکیڈمیز میں مذاق ہے۔
واضح رہے کہ امریکی صدر بارہا کہہ چکے ہیں کہ ایران کی فضائیہ اور بحریہ ختم کردی گئی ہے۔

ایرانی خبر رساں ادارے رویا نیوزکے مطابق، بحریہ کے کمانڈر نے کہا ہے کہ ملک جلد ہی نئی فوجی صلاحیتوں کا اظہار کرے گا جن سے اس کے مخالفین خوفزدہ ہیں۔ انہوں نے خبردار کیا کہ یہ ہتھیار دشمن کے قریب تعینات کیے جائیں گے۔ایرانی میڈیا میں شائع ہونے والے بیان میں کمانڈر نے کہا کہ ایران کے بحری جہاز مسلسل ملک کے بندرگاہوں سے آتے جاتے رہتے ہیں، جو آپریشنل تیاری کا حصہ ہے۔انہوں نے یہ بھی کہا کہ ایران نے آبنائے ہرمز کو مؤثر طریقے سے بند کر دیا ہے اور خبردار کیا کہ اگر کوئی مخالف مزید آگے بڑھنےکی کوشش کرے گا تو تہران کارروائی کرے گا۔

صدر ڈونلڈ ٹرمپ نے اعلان کیا ہے کہ ایران کے ساتھ جوہری معاہدہ ہونے تک بحری محاصرہ جاری رکھا جائے گا۔الجزیرہ کے مطابق ٹرمپ کا کہنا ہے کہ یہ محاصرہ بمباری سے زیادہ مؤثر ہے اور اس سے ایران پر دباؤ مزید بڑھے گا۔ ایک ایرانی ذریعے کے حوالے سے بتایا گیاہے کہ تہران نے امریکا کو ’عملی اور غیر معمولی اقدام‘ کی دھمکی بھی دی ہے۔

امریکی فوج نے کہاہے کہ ایران پر عائد بحری محاصرہ بہت مؤثرثابت ہو رہا ہے، اس نے ایرانی بندرگاہوں کی طرف آنے جانے والی تجارت کو محدود کر دیا ہے۔
بیان کے مطابق امریکی افواج سمندر کے ذریعے سامان کی ترسیل روکنے کے لیے بھرپور کارروائیاں کر رہی ہیں، جس کے نتیجے میں ایران کو 6 ارب ڈالر سے زائد کا نقصان ہو چکا ہے، اور اس کی تیل برآمدات بھی متاثر ہوئی ہیں۔

امریکی انتظامیہ مسلسل یہ مؤقف دہرا رہی ہے کہ جب تک آبنائے ہرمز کھولی نہیں جاتی اور ان کے مطالبات کے مطابق معاہدہ نہیں ہوتا محاصرہ برقرار رہے گا۔

دوسری جانب ایران نے بھی واضح کیا ہے کہ وہ پہلے بحری محاصرہ ختم کرنے کا مطالبہ کرتا ہے، اس کے بعد ہی آبنائے ہرمز کے معاملے پر بات چیت ممکن ہوگی، جہاں جنگ کے بعد سے جہاز رانی شدید متاثر ہو چکی ہے۔

الجزیرہ عربک کے مطابق اسرائیلی فورسز نے جنوبی لبنان کے قصبے برج قلاویہ پر ڈرون حملہ کیا ہے۔
یہ رپورٹ ایسے وقت میں سامنے آئی جب اسرائیلی فوج نے دعویٰ کیا کہ اس نے جنوبی لبنان میں اپنی فورسز کے قریب فضائی حدود میں ایک “مشکوک پرواز” کو روک کر تباہ کر دیا ہے۔

لبنانی فوج کے مطابق ملک کے جنوبی علاقے میں امدادی کارروائیاں انجام دینے کے دوران اسرائیل کے حملے میں اس کے دو فوجی زخمی ہو گئے۔

اسرائیل سے جنگ بندی کے بعد اس نوعیت کے پہلے بیان میں لبنانی فوج نے کہا: ’گشت کرتے فوجی دستے کو اسرائیل کی جانب سے ہدف بنایا گیا، جس سے دو فوجی زخمی ہو گئے۔‘

بیان کے مطابق یہ دستہ شہری دفاع کے اہلکاروں اور دو غیر فوجی بلڈوزروں کے ہمراہ جنوبی لبنان میں شہریوں کو بچانے کا کام کر رہا تھا۔

اسرائیل کا کہنا ہے کہ وہ لبنان میں حزب اللہ کے ٹھکانوں کو نشانہ بنا رہا ہے۔

خلیجی تعاون کونسل کے رہنما سعودی شہر جدہ میں غیر معمولی اجلاس میں جمع ہوئے جہاں ایران سے بڑھتے عسکری خطرات، آبنائے ہرمز کی بحالی اور توانائی پالیسیوں پر اہم مشاورت کی گئی۔
سعودی عرب کے شہر جدہ میں خلیجی تعاون کونسل (جی سی سی) کا ہنگامی اجلاس منعقد ہوا، جس میں خلیجی ممالک کی قیادت نے شرکت کی۔ ایران میں جنگ کے آغاز کے بعد یہ پہلا موقع ہے کہ خلیجی رہنما آمنے سامنے بیٹھے۔
اجلاس میں ایران کی جانب سے 28 فروری کے بعد سے خلیجی ممالک کی طرف داغے گئے بیلسٹک میزائلوں اور ڈرون حملوں کے خطرے پر مشترکہ حکمت عملی زیر غور آئی۔ ساتھ ہی آبنائے ہرمز کو دوبارہ کھولنے کے اقدامات پر بھی بات چیت کی گئی، جو تیل، گیس اور دیگر اہم مصنوعات کی عالمی ترسیل کے لیے نہایت اہم گزرگاہ ہے۔
یہ اجلاس ایسے وقت میں ہوا جب متحدہ عرب امارات نے اعلان کیا ہے کہ وہ یکم مئی سے اوپیک تنظیم چھوڑ رہا ہے۔ امارات، جو اوپیک کا تیسرا بڑا اور دنیا کا ساتواں بڑا تیل پیدا کرنے والا ملک ہے، نے کہا ہے کہ یہ فیصلہ اس کی طویل مدتی معاشی حکمت عملی کا حصہ ہے۔ ملک نے 2027 تک اپنی یومیہ تیل پیداوار کو 36 لاکھ بیرل سے بڑھا کر 50 لاکھ بیرل تک لے جانے کا منصوبہ ظاہر کیا ہے۔
دوسری جانب قطر میں وزارتِ خارجہ نے بریفنگ کے دوران اپنے مؤقف کا اعادہ کیا کہ ایران کے خلاف امریکا اور اسرائیل کی جنگ کے خاتمے کے لیے ایک جامع معاہدہ ناگزیر ہے۔